गोरखा समाचारदाता
कृषि ज्ञान केन्द्र गोरखाले जिल्लाका उत्कृष्ट कृषक, समूह र सहकारीलाई सम्मान गरको छ ।
बिहीबार एक कार्यक्रम गरी १/१ वटा सहकारी र समूह तथा ३ जना कृषकलाई नगद र प्रमाण पत्र दिएर सम्मान गरिएको केन्द्रले जानकारी दिएको छ । जिल्ला समन्वय समितिका उपाध्यक्ष जनुका अधिकारीको अध्यक्षतामा तथा प्रमुख जिल्ला अधिकारी देबेन्द्र लामिछानेको प्रमुख आतिथ्यतामा भएको कार्यक्रममा अजिरकोट गाउँपालिका–३ को कालिका कृषि सहकारी संस्था लि.र ४ को सबल कृषक समूहलाई जनही २० /२० हजार र प्रमाण पत्र दिएर सम्मान गरिएको थियो ।
कफी उत्पादन तथा बजारीकरणमा योगदान पुरयाएको भन्दै कालिका कृषि सहकारी र अदुवा, बेसार र तरकारी उत्पादन तथा बजारीकरणमा योगदान पुरयाएको भन्दै सबल कृषक समूहलाई सम्मान गरिएको आयोजक कृषि ज्ञानकेन्द्र गोरखाले जानकारी दिएको छ । सोही कार्यक्रममा जिल्लाका ३ जना कृषक कृषक उत्कृष्ट घोषित भएका छन् । गोरखा नगरपालिका–७ का शेरबहादुर श्रेष्ठ र २ का भक्तप्रसाद श्रेष्ठ र गण्डकी गाउँपालिका– ६ का सुर्यनारायण श्रेष्ठलाई जनही १०/१० हजार पुरस्कार र सम्मान पत्र प्रदान गरिएको छ ।
सम्मानित कृषकहरुले जिल्लामा तरकारी, माछा, हाँस र कुखुरा उत्पादन तथा बजारीकरणमा सहयोग पुरयाएको बताइएको छ । पुरस्कार तथा सम्मान कार्यक्रम सञ्चालन बिधी २०७५ को अधिनमा रही छनोट तथा मुल्याकन समितिले सिफारी गरे अनुसार उनीहरुलाई सम्मान एवं पुरस्कृत गरिएको हो ।