एजेन्सी :असार २७ गते । राष्ट्रपति डोनल्ड ट्रम्पले सन् २०२० को अमेरिकी जनगणनाको प्रश्नावलीमा नागरिकतासम्बन्धी प्रश्न थप्ने प्रयास अब नगर्ने भएका छन् । जनगणनामा नागरिकतासम्बन्धी प्रश्न थप गर्ने योजना सर्वोच्च अदालतले गत जुन महिनामा रोकेपछि ट्रम्प त्यसवाट पछि हटेका हुन् ।
अदालतको आदेशका कारण जनगणनामा ढिलाइ हुन सक्ने भएकोले त्यसको सट्टा एउटा कार्यकारी आदेशमार्फत् जनसंख्या सम्वन्धी सूचना सङ्कलन गर्न उनले निर्देशन दिएका छन् । अमेरिकाको जनसंख्याको नागरिकताको अवस्था निक्यौल गर्ने हाम्रो प्रयासबाट आफु पछि नहटेको ट्रम्पले उल्लेख गरेका छन् ।
ट्रम्पको आदेशसँगै सरकारी निकायहरूले सबैको नागरिकतासम्बन्धी कागजात उपलब्ध गराउनुपर्नेछ । यो आदेशपछि अमेरिकामा कति नागरिक, अनागरिक र गैरकानुनी मानिसहरू बसिरहेका छन् भन्ने जानकारी आउने ट्रम्पको विश्वास छ ।
आप्रवासी परिवारलाई जनगणनामा सहभागी हुन निरुत्साहित गर्ने उद्देश्यले ट्रम्पले प्रश्न थप्न लागेको आरोप लाग्दै आएको थियो । अधिकारकर्मीहरुले गैरश्वेत अमेरिकीहरूमाथिको आक्रमण समेत भनेका थिए ।