नरेन्द्र ढकाल
भूकम्प गएको ४ वर्ष बितिसक्दा समेत नाम छुटेका पिडितले अनुदान पाएका छैनन् । लाभग्राहीको सूचीमा नाम समावेश नभएको भन्दै गुनासो फारम भरेका ११ हजार ९ सय ५७ मध्ये अहिले सम्म ३ सय ९८ घरको पुर्नसर्वक्षण हुन सकेको छैन् । ‘गोरखा नगरपालिका र भीमसेन थापा गाउँपालिकामा छुट तथा पुनःजाँच सर्वेक्षण लागत संकलन बाँकी छ’ जिल्ला आयोजना कार्यान्वय इकाईका भवनका इन्जिनिर युवक श्रेष्ठले भने ‘अरु ९ वटा स्थानीय तहमा यो काम सकिसकेको छ ।’ गोरखा नगरपालिकामा २ सय ९८ र भीमसेन थापा गाउँपालिकामा १ सय घरको पुनःजाँच सर्वेक्षण बाँकी रहेको उनले बताए । पुनःजाँच सर्वेक्षण गरिपाउँ भनि निवेदन दिएका ११ हजार ९ सय ५७ मध्ये ११ हजार ५ सय ५९ घरको स्थलगत लगत संकलन सकिएको राष्ट्रिय पुर्ननिर्माण प्राधिकरणले जानकारी दिएको छ । ‘हाम्रो घर भत्किदाँ पनि अनुदान पाएयौं भनेर जसले स्थानीय तहमा निवदेन दिनुभएको थियो’ उनले भने ‘हामीले उहाँहरुको घरको स्थलगत पुनःजाँच सर्वेक्षण गरिएको छ ।’
गोरखा नगरपालिकाबाट २ हजार ६६ घर परिवारले निवेदन दिएकोमा १ हजार ७ सय ६८ घरको स्थगत लगत संकलन सकिएको उनले बताए । पालुङ्टार नगरपालिकामा १ हजार ८ सय ६५ घरको छुट तथा पुनःसर्वेक्षण जाँच भएको छ । यसैगरी आरुघाट गाउँपालिकामा ९ सय ३४, बारपाक सुलिकोट गाउँपालिकामा ७ सय ६३, सिरानचोक गाउँपालिकामा ८ सय ४४ र शहिद लखन गाउँपालिकामा १ हजार ४ सय ७४ घरको पुनःसर्वेक्षण गरिएको जिल्ला आयोजना कार्यान्वय इकाइले जानकारी दिएको छ । यसैगरी गण्डकी गाउँपालिकामा १ हजार २ सय ३९, धार्चे गाउँपालिकामा ४ सय, चुमनुब्री गाउँपालिकामा ४ सय ३८, भीमसेन थापा गाउँपालिकामा १ हजार ३ सय ७ र अजिरकोट गाउँपालिकामा ६ सय २७ घरको पुनःसर्वेक्षण जाँच गरिएको इन्जिनियर श्रेष्ठले बताए ।
२०७२ बैशाख १२ गते गएको विनाशकारी भूकम्पले भत्काएका ७१ हजार ७६ घरलाई लाभग्राहीको सूचीमा समावेश गरिएको छ । ती मध्ये ६५ हजार ७ सय १८ घर पूर्ण क्षति रहेकोले पुनःनिर्माण गर्नुपर्ने निष्कर्ष निकालिएको थियो । यसैगरी ५ हजार ३ सय ४९ घरमा भूकम्पको आंशिक असर परेकाले मर्मत अथार्त प्रवलीकरण गर्ने सूचीमा राखिएको छ । कुल लाभग्राही मध्ये हालसम्म ५२ हजार ८ सय ११ घर निर्माण सम्पन्न भइसकेका छन् । उक्त घरको तेश्रो किस्ता समेत वितरण भइसकेको छ ।
हालसम्म ५९ हजार ३ सय ४५ जनाले दोश्रो र ६४ हजार ९ सय ९२ लाभग्राहीले पहिलो किस्ता बुझेका छन् । प्रवलीकरण अनुदान तर्फ भने १ हजार ५ सय ४३ जनाले पहिलो, ४९ जनाले दोश्रो र ३३ लाभग्राहीले तेश्रो किस्ता लिएका छन् । लाभग्राहीको सूचीमा रहेका ६ हजार ७५ घर परिवारले अहिलेसम्म पहिलो किस्ता समेत बुझेका छैनन् । यसैगरी प्रवलीकरणको सूचीमा रहेका ३ हजार ८ सय ६ र पुनःनिर्माणको सूचीमा रहेका २ हजार २ सय ६९ घर परिवारले पनि अहिलेसम्म पहिलो किस्ताको रकम नलगेको पुनःनिर्माण प्राधिकरणले जानकारी दिएको छ ।
तस्विर गुगलबाट कपी गरीएको हो