गोरखा समाचारदाता
चैत्र २१ गते । अर्थमन्त्री डा.युवराज खतिवडाले विकास र वातावरणलाई सँगसँगै अघि बढाउदै नेपालले व्यवसाय विस्तार गर्न चाहेको बताएका छन् । साउथ एशियन फेडेरेशन अफ अकाउन्टेन्टस् (साफा) को अन्तराष्ट्रिय सम्मेलनको बिहिबार काठमाडौमा उद्घाटन गर्दे अर्थमन्त्री खतिवडाले देशलाई फोहोरी उद्योगको डम्पिङ साइट बनाउन नहुने बताएका हुन ।
असल व्यवसायिक वातावरण बनाउन लेखापरीक्षकको महत्वपूर्ण भूमिका हुने भन्दै मन्त्री खतिवडाले उच्च मनोबलका साथ काम गर्न लेखा परीक्षकहरूलाई आग्रह गरे । मन्त्री खतिवडाले आउँदो दशकमा दक्षिण एशिया विश्वकै लगानीको केन्द्र हुने र नेपाल दक्षिण एशियाको ‘राइजीङ स्टार’ हुने जिकिर समेत गरे ।
‘इनेब्लिङ बिजनेश इन्भाइरोन्मेन्ट फर इकोनोमिक डेभलपमेन्ट’ शीर्षकमा साफाले सम्मेलनको आयोजना गरेको हो । सम्मेलनमा २५० भन्दा बढी राष्ट्रिय तथा अन्तरराष्ट्रिय लेखा व्यवसायीको सहभागिता रहेको छ ।