नरेन्द्र ढकाल/गोरखा
चैत्र १८ गते । जिल्लामा विद्युत सेवाका प्रयोगकर्ताले समयमै महशुस तिर्न आनाकानी गर्ने गरेको पाइएको छ । नेपाल विद्युत प्राधिकरण वितरण शाखा गोरखाले दिएको जानकारी अनुसार हालसम्म १ करोड १२ लाख भन्दा बढि रकम ग्राहकले बैक्यौता तिर्न बाँकी रहेको छ । ‘यो रकम समग्र महशुलको हो’ वितरण शाखा प्रमुख माधव न्यौपानेले भने ‘भर्खरै मिटर रिडिङ भएकाले धेरै रकम त केही दिनमा उठ्छ । केही भने समस्या नै छ ।’
गत हप्ताको सोमबारसम्म ५७ लाख १४ हजार ६ सय ग्राहस्य, ११ लाख २९ हजार ५ सय ७४ व्यापारिक र ८ लाख ४६ हजार २ सय ८३ गैरव्यापारिक क्षेत्रको विद्युत महशुल उठ्न बाँकी रहेको विद्युत प्राधिकरणको तथ्याङ्कमा उल्लेख छ । यसैगरी ८ लाख ३२ हजार ५९ औद्योगिक, १० हजार ९ सय १९ सिञ्चाई, १२ लाख ३१ हजार ६ सय २७ खानेपानी, ८ हजार ८ सय २१ मठमन्दिर र २२ लाख ३२ हजार ३ सय १३ सामुदायिक गरी १ करोड १२ लाख भन्दा बढि रकम ग्राहकको नाममा बक्यौता देखिएको हो ।
सामुदायिक तर्फको अधिकाशं रकम सडक वक्ति तर्फ रहेको प्राधिकरण श्रोतले बताएको छ । ‘अन्य जिल्लामा जस्तो गोरखामा समस्या त छैन’ उनले भने ‘वक्यौता उठिराको स्थिती पनि छ, हामी त्यस्तो खराव स्थितीमा छैनौं तर ताकेता चाहीँ गर्न परिराको अवस्था हो ।’ उक्त रकम तिर्नका लागि कार्यालयले गाह्रकलाई बारम्बार ताकेता गरिरहेको छ । ३ महिना भन्दा बढि समयसम्म महशुल नतिर्ने ग्राहकको लाइन काट्ने काम पनि भइरहेको कार्यालयले बताएको छ । ‘कतिपय ग्राहकहरु भूगोलको हिसावले टाढा हुनुहुन्छ ।
रकम बुझाउन आउँदा ढिला भएको पनि हुन सक्छ’ उनले भने ‘कतिपय सुगममा भएर पनि प्रविधि नबुझेका कारण समयमा रकम बुझाउनु हुन्न ।’ अहिले मोबाइल बैंकिङको प्रयोग गरी इसेवा मार्फत बिद्युतको महशुल भुक्तानी गर्न सकिने भएपनि ग्राहकहरुले उक्त सेवा प्रति चासो नदिएको उनले बताए । सेवाग्राहीलाई उक्त विषयमा जानकारी गराउन सचेतना मुलक कार्यक्रम सञ्चालन गर्ने योजना कार्यालयको छ । ‘त्यो कुरा नबुझेर पनि उहाँहरुले धेरै समयसम्म नतिर्नु भएको हुन सक्छ’ उनले भने ‘छिट्टै हामी त्यसको प्रचारप्रसार गर्दैछौं ।’
भूकम्पपछि नयाँ ठाउँमा घर बनाएकाहरुले पुरानो मिटर बन्द गर्न कार्यालयलाई जानकारी नगराएको, उद्योग धन्दाहरु बन्द हुँदा सम्म मिटर बन्द नगराएको, सडक एवं सार्वजानिक स्थलमा बालिएका वक्तिको समयमै महसुल भुक्तानी नहुँदा बक्यौता रकम बढि भएको कार्यालय स्रोतको भनाई छ । जिल्लाको क्षेत्र नम्बर २ का अधिकाशं भागमा केन्द्रिय प्रशारण लाईनको विद्युत पुगेको छ । साबिकको क्षेत्र नम्बर ३ अथार्त उत्तरी गोरखामा भने अहिले सम्म केन्द्रिय प्रशारण लाइनको विद्युत सेवा पुग्न सकेको छैन । उक्त भुभाग अहिले क्षेत्र नम्बर १ मा पर्छ त्यहाँका नागरिक लघु जलविद्युतमा भर पर्नुपर्ने अवस्था छ ।
जिल्लामा सदमुकाम, मजुवा देउराली र पालुङटार गरी ३ ठाउँमा विद्युतको महसुल तिर्ने काउण्टरहरु राखिएको छ । कतिपय उपभोक्तालाई महशुल तिर्न एक दिनको यात्रा गर्नुपर्ने बाध्यता छ ।