कैलासबावु श्रेष्ठ/गोरखा
फागुन ३ गते । गोरखा नगरपालिकाको चौथो नगर सभा सम्पन्न भएको छ ।
गोरखा नगरपालिकाको आयोजनामा सदरमुकाममा आयोजित नगरसभाले नगरपालिकाको स्वास्थ्य सेवा बिधेयक २०७५, न्यायिक समिति (कार्यविधी) ऐन २०७४ संशोधन बिधेयक २०७५ र कार्यकापालिकाको बैठकका विभिन्न निर्णयहरु सर्व सम्मतले पास गरेको छ ।
नगर प्रमुख राजनराज पन्तको अध्यक्षतामा भएको सभामा कुल विनियोजित ८५ करोड ३५ लाख ७० हजार ९ सय ४७ रुपैयाँ मध्ये २६ करोड ५ लाख ३९ हजार ८९ रुपैयाँ खर्च हुदाँ ३०.५२ प्रतिशत प्रगति भएको नगरप्रमुख पन्तले सभालाई जानकारी दिनु भएको थियो ।
सभामा नेपाल सरकारबाट प्राप्त वित्तिय समानिकरण अनुदान तर्फ प्राप्त ७ करोड ११ लाख १ हजार ३ सय ९७ रुपैयाँ, सशर्त अनुदान तर्फ १५ करोड ७२ लाख ३३ हजार ५ सय ४० रुपैयाँ र राजस्व बाँडफाँड तर्फ ३ करोड ८२ लाख ६७ हजार ६६ पैसा गरी कुल २६ करोड ६५ लाख १ हजार ९ सय ३७ रुपैयाँ ६६ पैसा आम्दानी भएको समेत जानकारी दिनु भएको थियो ।
त्यस्तै गरी प्रदेश राजस्व बाँडफाँड, सामाजिक सुरक्षा भत्ता, नगरपालिका भित्र सञ्चालित नगद जन सहभागिता, सडक बोर्ड, गत बर्षको अ.ल्या. र आन्तरीक आय तर्फ माघ मसान्त सम्ममा १० करोड ६० लाख ५२ हजार ३ सय १६ रुपैयाँ ६५ पैसा संचित खातामा रहेको समेत नगर प्रमुखले सभाषदहरुलाई जानकारी गराउनु भएको थियो ।
सभामा बोल्दै नगर प्रमुख पन्तले ऐतिहासिक गोरखा गेट निर्माण, पर्यटकीय भिमसेन पार्क जाने बाटो स्तरबृद्वि, शहरी स्वास्थ्य भवन निर्माण, मद्रसा भवन, सिंचाई र खानेपानी योजना, सडक निर्माण, बहु उद्वेश्यीय भवन निर्माणको कामको थालनी भई रहेको जानकारी दिदै आ.व.२०७५/२०७६ मा स्विकृत ३ सय १६ वटा योजना मध्ये २ सय ८३ योजना सम्झौता भई कार्य भई रहेको समेत जानकारी गराउनु भएको थियो ।
