- एकै मितिमा दुई महोत्सव
नरेन्द्र ढकाल/गोरखा
माघ १५ गते । जिल्लाको पालुंटारमा एकै मितिमा दुईवटा महोत्सव हुने भएको छ । केही समय यता आपसी प्रतिस्पर्धामा उत्रिएका गोरखा उद्योग वाणिज्य सघं र चेम्बर अफ कमर्सले एकै पटक छुट्टाछुट्टै महोत्सव गर्न तयारी गरेका हुन् । ‘हामीले पालुंटारमा महोत्सव गर्ने भनेर धेरै पहिले घोषणा गरेका थियौं’ चेम्बर अफ कर्मस पालुंटारका अध्यक्ष मानबहादुर पौडेलले भने ‘उहाँहरुले अस्ती भर्खर हाम्रो योजनालाई प्रभावित बनाउने गरी महोत्सवको मिति घोषणा गर्नु भयो ।’
यता गोरखा उद्योग वाणिज्य संघ पालुंटार बजार इकाईले भने चेम्बरले नै महोत्सव भाड्न खोजेको दाबी गरेको छ । उद्योग वाणिज्य संघले सबै प्रक्रिया पुरा गरेर महोत्सव गर्ने घोषणा गरेपछि चेम्बरले मिति सारेर जुधाएको उसको आरोप छ । ‘यो निर्णय हामीले अशोज मै गरेका थियौं पुस ३० गते नगरपालिकाबाट स्वीकृती समेत लिइसकेका छौं, अस्ती ३ गते पत्रकार सम्मेलन मात्र गरेका हौं’ महोत्सव मुल समारोह समितिका संयोजक आशिष देवकोटाले भने ‘कहिले १४ गते गछौं भन्नु हुन्छ कहिले १ गते, उहाँहरुको कुरा के हो हामीले बुझ्न सकेका छैनौं ।’
गत मंसिरको ७ गते बसेको चेम्बरको बैठकले फागुनको १४ देखि २१ सम्म पालुंटारमा महोत्सव गर्ने निर्णय गरेको थियो । सोही अनुरुप तयारी सुरु भइसकेका बेला गोरखा उद्योग वाणिज्य संघ पालुंटार बजार इकाईले बखेडा झिकेको गोरखा चेम्बर अफ कमर्सका अध्यक्ष भाईचन्द्र श्रेष्ठले आरोप लगाएका छन । ‘यो सबै नियोजित षडयन्त्र हो, हाम्रो कार्यक्रम भाड्न उहाँहरु लाग्नु भएको छ’ उनले भने ‘मंसिरमा घोषणा भएको कार्यक्रम बिथोल्न १५ दिन अघि पत्रकार सम्मेलन गरी महोत्सव गर्ने तयारी गर्नु भएको छ रे भन्ने हामीले सुनेका छौं ।’
गत माघ ३ गते उद्योग वाणिज्य सघंले आगामी फागुन ३ गते देखि १२ गतेसम्म पालुंटारमा महोत्सव गर्ने घोषणा गरेको थियो । नगरपालिकाबाट समेत स्वीकृती लिइसकेको र स्टल निर्माणका लागि आवश्यक सामाग्री आउने क्रम सुरु भएको उसको दाबी छ । ‘हाम्रो ९५ प्रतिशत तयारी भईसकेको छ । अब स्टल निर्माणको लागि सामानहरु पनि झर्न सुरु गरेको छ’ महोत्सव मुल समारोह समितिका संयोजक आशिषले भने ‘कलाकारहरुको लिस्ट फाइन गरी ब्यानर समेत बनाइसकेका छौं । अतिथिहरुलाई पत्राचार समेत गरिसकिएको छ ।’
उद्योग वाणिज्य सघंले पत्रकार सम्मेलन गरी महोत्सवको मिति तय गरेपछि चेम्बरले पनि नयाँ मिति तोकेको छ । ‘हाम्रो सबै तयारी भइसकेको छ । हेलिकप्टर, ¥याटिङ, कलाकारहरु सबैको एग्रिमेन्टन गरिसके छौं’ चेम्बर अध्यक्ष मानबहादुरले भने ‘बाल उद्यान निर्माण देखि अतिथिहरुको लागि निमन्त्रणा समेत भइसकेको छ ।’ समयमै जानकारी गराएर कार्यक्रम आयोजना गरेपनि नगरपालिकाले पूर्वाग्रही व्यवहार देखाएको उनको आरोप छ ।
दुबै आयोजकले पालुंटार नगरपालिका ५ को भवानी बहुमुखी क्यापस प्रागढमा महोत्सव गर्ने तयारी गरेका छन् । कार्यक्रमको लागि बोलाइएका कलाकार देखि अतिथिहरुको लिस्ट पनि एउटै देखिन्छ । तर कार्यक्रम भने फरक÷फरक भएपछि स्थानीय भने अन्यौलमा परेका छन् । गोरखा उद्योग वाणिज्य संघका अध्यक्ष जिवनज्योति श्रेष्ठले भने इकाईले महोत्सव गर्ने भएकाले उक्त कुरा उनीहरुकै अधिकार भएको प्रतिक्रिया दिए । ‘साथीहरुले आधिकारिक रुपमा प्रस्ताव लिएर जानुभएको छ । नगरपालिकाले पनि स्वीकृती दिईसकेको छ भन्ने सुनेको छु’ उनले भने ‘अरुले के गरेको छ हामीलाई थाहा छैन ।’
उता पालुंटार नगरपालिकाका प्रमुख दिपकबाबु कंडेलले भने मिलेर महोत्सव गर्न आग्रह गरेका छन् । दुई व्यापारिक सस्थाहरु विचको प्रतिस्पर्धाले गतल सन्देश गएको उनको टिप्पणी छ । ‘हामीले उहाँलाई मिलेर गर्नु भन्ने आग्रह गरिरहेका छौं’ उनले भने ‘यदि मिल्न सक्नु हुन्न भने आलोपालो गर्न सक्नु हुन्छ तर अनावश्यक बखेडा भने गर्न भएन ।’