कैलासबावु श्रेष्ठ/गोरखा
पौष १० गते । गोरखा सदरमुकाममा भई रहेको दशौं गोरखा महोत्सव स्थलभित्र म्याद गुज्रुएका खाद्यसामाग्रीहरु फेला परेको छ । जिल्ला अनुगमन टोलीले सोमबार गरेको अनुगमनका क्रममा विभिन्न किसिमका त्यस्ता खाद्य वस्तु फेला परको हो ।
महोत्सव स्थलमा अखाद्य बस्तु भएको भन्दै सर्व साधारणहरुले जिल्ला प्रशासन कार्यालयमा पटक पटक मौखिक जानकारी दिए पछि सोमबार दिउसो अनुगमन टोलीले महोत्सव स्थलमा राखीएको सामानको अनुमान गरेको थियो ।
जिल्ला प्रशासन कार्यालयका सूचना अधिकारी गौतम भण्डारीका अनुसार महोत्सव स्थल भित्र बिक्रीका लागि राखीएको ध्यू, दालमोठ र अचार उपयोग गर्ने समयावधी सकिएको र केही अन्य खाद्य सामाग्रीहरुमा कुनै पनि लेबल नलगाई बिक्रीको लागि राखीएको पाईएको बताए । भण्डारीका अनुसार त्यस्ता सामाग्री जफत गरी बिक्रेतालाई सचेत गराईएको छ ।
महोत्सव स्थलमा नै पिउने पानीको रुपमा ललितपुरमा उत्पादन भएको वाटर किंङ्ग आक्वा नामको पानी समेत म्याद गुज्रिएको पाईएको छ ।
तर अनुगमन टोलीले गरेको अनुगमन समेत फितलो देखीएको छ । सचेत गराईएका सबैले तत्कालै त्यस्ता सामाग्री पुनः बिक्रीका लागि राखीएको एक उपभोत्ताले बताए । बिक्रीका लागि राखीएका त्यस्ता सामाग्रीहरुमा अचार, दालमोठ, भूजियाका केही परिकार छन । उनीहरुले मंगलबार समेत पहिलो दिनमा जस्तै गरी बिक्री वितरण गरी रहेका छन ।
यता आयोजक गोरखा उद्योग बाणिज्य संघ गोरखाका अध्यक्ष जिवन ज्योतिले आफुले मंगलबार त्यस्तो कुरा सुनेको र सबै स्टलमा पुगेर त्यस्ता सामाग्री तत्काल बिक्री बन्द गर्न भनेको बताए । श्रेष्ठका अनुसार घरेलु परिकार भने केही दिन अगाडी बनाएर स्टलमा राखीएको स्विकार गरे ।