दिपक श्रेष्ठ/गोरखा
कात्र्तिक १९ गते । किसानहरुको उत्पादनलाई प्रर्बद्धन गर्न किसान बजार सन्चालनमा आएपछि गोरखाका कृषकहरु खुशी भएका छन् । स्थानिय स्तरमा उत्पादित कृषिजन्य समाग्रीहरु कृषक आफैले बजारमा पु¥याएर बिक्रि गर्न पाउदा कृषकहरु उत्साहित भएका हुन् । जिल्लाको सहिद लखन गाउँपालिका वडा नम्बर ३ को रामशाहघाट बजारमा सन्चालनमा आएको बजारबाट हरेक हप्ताको शनिबार कृषिजन्य उत्पादनहरु कृषकहरु आफैले ल्याएर बिक्रि गर्न थालेका गाउँपालिकाका कृषि शाखा प्रमुख विजय पौडेलले जानकारी दिनुभयो । ‘कृषि उत्पादनलाई बढवा दिन गाउँपालिकाले कार्यक्रम नै बनाएर किसान बजार सन्चालनमा ल्याएको हो,’ प्रमुख पौडलले भन्नुभयो,‘ यसले गर्दा किसानहरुलाई पनि आफ्नो उत्पादन कहाँ बिक्रि गर्ने भन्ने समस्या हुदैन ।’ गाउँपालिकाको कृषि तथा पशु सेवा शाखाको आर्थिक तथा प्राबिधिक सहयोगमा बजार सन्चालनमा आएसंगै स्थानिय कृषकहरुले उत्पादन गरेका तरकारी, फलफुल लगायत सम्पूर्ण पशुजन्य उत्पादन बजारीकरण गर्न सजिलो भएको उहाँको भनाई छ ।
किसान बजार सन्चालनमा आएपछि बिगत २५ बर्षदेखि व्यवसायिक कृषिखेती गर्दै आउनुभएका सहिद लखन गाउँपालिका ३, कुुसुमपानीका तिल बहादुर गुरुङ पनि खुशी हुनुहुन्छ । ‘यसअघि बिचौलिया मार्फत बिक्रि गर्दा उपभोक्ता पनि मारमा परिराखेका थिए, हामी किसानले पनि भनेको मूल्य पाउन गाह्रो भएको थियो,’ उहाँले भन्नुभयो, ‘अब कृषक र उपभोक्ता दुवैलाई फाइदा पुग्ने भएको छ ।’ हप्ताभरी उत्पादन भएका तरकारी किसान बजारमा ल्याएर बेच्न पाउदा राम्रो मूल्य पाएको उहाँको भनाई छ । गाउँमा शुरु भएको बजारले गाँउ भित्रका व्यवसायिक किसानलाई मात्र नभएर साना किसानलाई समेत फाइदा पुगेको गुरुङ बताउनुहुन्छ । गाउँघरमा अधिकांस किसानहरुले घरमा खानका लागि थोरै भएपनि तरकारी खेती गर्छन,’ उहाँले भन्नुभयो, ‘अब घरमा उपभोग गरेर बढि भएको तरकारी समेत बजारमा ल्याएर बिक्रि गर्न पाउने भएपछि साना देखि ठूला सवै किसानको पहुच बजार सम्म पुगेको छ ।’
यस्तै गएको १० बर्षदेखि समुहगत रुपमा व्यवसायिक कृषिखेती गदै आउनु भएका सहिद लखन गाउँपालिका ३ स्थित लाफा नमुना कृषि समुहका अर्का किसान कवि थापाले पनि किसान बजार सन्चालनमा आएसंगै आफुहरुलाई सजिलो भएको बताउनुभयो । ‘अहिले धेरैथोरै जे जस्तो भएपनि सिधै उपभोक्तालाई बेच्न पाइयो, उपभोक्ताहरुले पनि ताजा बस्तु खरिद गर्न पाएका छन् ।’ उहाँले भन्नुभयो । लाफा नमुना कृषि समुहले किसान बजार मार्फत बिशेषगरी तरकारी, माछामासु, केरा लगायतका कृषिजन्य उत्पादनहरु बिक्रि गर्दै आएको थापाले जानकारी दिनुभयो । बजार शुरु भएको भर्खरै भएपनि बिक्रि भने राम्रो भएको कृषक उहाँको भनाई छ । ‘हाटबजारले कृषकहरुलाई कृषि उत्पादनमा लाग्न हौसला प्राप्त भएको छ,’उहाँले भन्नुभयो,‘उत्पादन गर्नसके बिक्रि गर्ने ठाउ पनि छ भन्ने अनुभूती सवै कृषकहरुले गर्न थालेका छन् ।’ लाफा नमुना कृषिसमुहले उत्पादन गर्दै आएको कृषिजन्य उत्पादनहरु यस अघि बाहिर बजारमा लगेर बिक्रि गर्दै आएको भएपनि अहिले भने बजारमा ल्याएर बिक्रि गर्न थलिएकोे उहाँले बताउनुभयो ।
उक्त हाटबजारमा बाहिर भन्दा कम मुल्यमा ताजा तरकारी खरिद गर्न पाएपछि उपभोक्तहरु समेत दंग छन् । तरकारी किन्न आँबुखैरेनीबाट आउनु भएकी बिमला श्रेष्ठले भन्नुभयो,‘ बाहिर बजारमा भन्दा यहाँको बजार ३० रुपैया सस्तो पनि पाइयो, फेरी गाउँघरमा उत्पादन गरेको भएकाले बाहिरबाट ल्याएको तरकारी भन्दा ताजा पनि छ ।’ बाहिर बजारमा काउली किलोको ८० रुपैया तिर्नुपर्छ यहाँ ५० रुपैयामा १ किलो काउली पाइदो रहेछ, उहाँले भन्नभुयो । सो ठाउँमा तँनहुको आबुँखैरनी गाउँपालिका, गोरखाको गोरखा नगरपालिका र सहिद लखन गाउँपालिकाबाट उपभोक्ताहरु सामान खरिद र बिक्रि गर्न आउने गरेका छन् । हरेक हप्ताको शनिवार मात्र सन्चालन हुने उक्त हाट बजारमा १ हजार देखि १२ सय जनासम्म आउने गरेको किसान बजार सञ्चालक समितिका अध्यक्ष होमनाथ रिमालले जानकारी दिनुभयो ।