गोरखा समाचारदाता
असोज २२ गते । शनिवारबाट सुरु भएको दशै सस्तो बजार एवं सडक मेला प्रचार गरिए जस्तो नभएको दर्शकहरुले बताएका छन् । नजिकै गरेका दशै, तिहार, छट लगायतका चाडपर्वलाई लक्षित गरी गोरखा चेम्बर अफ कमर्सले आयोजना गरेको उक्त मेलामा बाहिर भन्दा महंगोमा सामान बेचबिखन भएको उनीहरुको आरोप छ । ‘लेकाली आलु पाइन्छ रे भनेर किन्न आको एक किलो कै सय रुपयाँ पर्दो रहेछ’ महोत्सव स्थलमा भेटिएका भिमबहादुर गुरुङले भने ‘सस्तो मेला भन्ने त नाम मात्र रहेछ ।’
१३० वटा स्टल रहेको मेलामा अधिकाशं कपडा, जुस्ता चप्पल, भाँडा, श्रंगारका समान र खाजाका स्टलहरु छन् । आलु, भिर मौरीको मह, उत्तरी गोरखाको जडीबुटी, दशैका लागि भेडा च्याङ्ग्रा एवं खसिबोका बिक्रि स्टल सञ्चालन ल्याउने भनिए पनि मेला उक्त कुरा नभएको मेला अबलोकन गरेर फर्केकाहरुको भनाई छ । ‘लुगाफाटो बाहेक केही पनि रहेनछ त्यही पनि साह्रै महंगो’ लक्ष्मीबजारबाट मेला हेर्न आएकी सानुमायाँ भुजेलले भनिन् ‘यस्तो नी के सस्तो मेला ?’
मेलामा राखिएका सामानको मुल्य बजार पाइने सामानको भन्दा कुनै अन्तर नभएको उनीहरुको आरोप छ । मेलामा, बाहिर भन्दा पनि महंगोमा मुल्य रहेकाले केही पनि नकिनेको फर्किएको मेला स्थलबाट बाहिरिदै गरेका दुर्गाबहादुर थापाले बताए । ‘बाहिर भन्दा केही फरक छैन’ उनले भने ‘सस्तो बजार मेला भने पछि कम्तिमा २÷४ रुपयाँ त सस्तो हुनु प¥यो नी ?बाहिरकै मुल्यमा सामान किन्नु परे धुलो खान किन यहाँ आउनु ?’ आयोजकले साल्ट ट्रेडिङ कर्पोरेसको समन्वयमा सुपथ मुल्यमा चिनी र नुन बिक्रिको व्यवस्था मिलाएको दाबी गरे बजार चिनी नपाएको कतिपयको गुनासो छ । १८ रुपयाँ प्रति केजि नुन र ७० रुपयाँ प्रतिकेजी चिनीको मुल्य निर्धारण गरिएको छ ।
यता मेलाको आयोजकले भने बाहिर भन्दा महंगोमा सामान बेचिएको गुनासो आफूहरुलाई नआएको दाबी गरेको छ । ‘सामान महंगो भयो भनेर कसैले पनि भन्न आउनु भएको छैन’ गोरखा चेम्बर अफ कमर्सका महासचिव रामस्वरुप श्रेष्ठले भने ‘केही व्यक्तिले मेलालाई भड्काउन यस्तो प्रचार गरेका हुनसक्छन, साँच्चिकै मंहगोमा सामान किनबेच भइरहेको छ कि छैन अध्ययन गर्छौं ।’ आयोजकले सोमबार मेलामा रहेका स्टलहरुको अनुगमन गरी सस्तोमा सामान बेच्न आवश्यक निर्देशन दिने उनले बताए । सुपथ मुल्यको नुन र चिनीको उपलब्धता सहज भए नभएको बारे पनि सोमबार अध्ययन गर्ने आयोजकले बताएको छ । ‘नुन चिनी अस्ती मात्र आइपुगेको हो, औपाचारिक कार्यक्रमका कारण हामीले त्यसको विक्रिबारे जानकारी लिन सकेका छैनौं’ महासचिव श्रेष्ठले भने ‘यसको पनि अनुगमन हुन्छ ।’
दशैका लागि लक्षित गरी सञ्चालन गर्ने खसिबोका, भेडा, च्याङ्ग्राको बजार भने फुलपातीको केही दिन अघिबाट मात्र सुरु हुने आयोजकले स्पष्ट पारेको छ । मेलामा ल्याउनका लागि खसिबोका, भेडा च्याङ्ग्रा प्रबन्ध भइसकेको श्रेष्ठले बताए । ‘जसले स्टल बुक गर्नुभएको छ उहाँहरु ल्याउनका लागि रेडि हुनुहुन्छ’ उनले भने ‘दशै आउन अझै धेरै दिन बाँकी छ फुलपातीको केही दिन अघिबाट मात्र त्यसको बिक्रि खुल्ला हुन्छ ।’ अहिले देखि खसिबोका राख्न समस्या हुने भएकाले बिक्रिका लागि नल्याएको उनले बताए ।
मेलाको दोश्रो दिन उल्लेख्य दर्शकहरुले मेला अबलोकन गरेको आयोजकले दाबी गरेको छ । दिउँसो ३ बजेबाट विभिन्न राष्ट्रिय कलाकारहरुले प्रस्तुतिले दशै सस्तो बजार एवं सडक मेलालाई तताएको थियो । यसैविच मेलाको तेश्रो दिन आज बिकास नेपाली, निरा थापा, चन्द्र परियार, मिरा गोर्खाली, जादुगर बलराम, साजन गुरुङ लगायतका राष्ट्रिय तथा स्थानीय कलाकारको प्रस्तुति रहने महासचिव श्रेष्ठले जानकारी दिए । यसैगरी मध्यान्न १२ बजेपछि नयाँ वसपार्क देखि कार्यक्रम स्थल हरमटारीसम्म गोरखा नगरपालिका वडा नम्बर ५ पस्लाङका कलाकारहरुले सोरठी नाच प्रस्तुत गर्ने कार्यक्रम छ ।

लेखकबाट थप:

• लकडाउन नियम उलंघन गरेपछि सेल्टिक र एबरडीनबीचको खेल स्थगित
• पारिवारीक बनमा ठकुरी
• नेपालमै बन्छ विश्वका ७० देशलाई चाहिने आँखाको लेन्स
• सबै वडामा स्वास्थ्य चौकी बनाउने योजना
• टेष्ट वरियतामा कोहली शिर्ष स्थानमा उग्लिए