गोरखा समाचारदाता
गोरखा नगरपालिकाको वडा नम्बर ७ मा निशुल्क स्वास्थ्य जाँच शिविर सम्पन्न भएको छ । गोरखा नगरपालिकाको समन्वयमा तथा वडा नम्बर ७ को आयोजनामा भएको महिला रोग सम्बन्धि शिविरमा २ सय ५४ जनाले स्वास्थ्य जाँच गराएका छन् ।
नयाँबजार स्थित अर्याल मेडिकल हलको बिशेष सहयोग तथा ब्यवस्थापनमा भएको शिबिरमा ६४ जनाको निशुल्क भिडियो एक्स्रे समेत गरिएको छ । शिविरमा जाँच गराउन आएकाहरु मध्ये केहीलाई जटिल खालको समस्या देखिएको र ३ जनालाई पाठेघरको अप्रेशन गर्नु पर्ने देखिएको अर्याल मेडिकलका संचालक विनोद अर्यालले जानकारी दिएका छन् ।
भरतपुर अस्पतालका बरिष्ठ स्त्री रोग बिशेषज्ञ श्रीप्रसाद अधिकारीको नेतृत्वको चिकित्सक टोलीबाट जाँच भएको शिवरबाट गोरखा नगरपालिकाको ५, ६, ७, ८, ९, १० र ११ नम्बर वडाका स्थानीयले सेवा लिएका छन् । गोरखा क्याम्पसको प्रांगढमा भएको महिला रोग सम्बन्धि शिविरमा निशुल्क औषधी समेत बितरण गरिएको थियो ।
शिविरको गोरखा नगरपालिकाका नगरप्रमुख राजनराज पन्तले उद्घाटन गरेका हुन् । वडा नम्बर ७ का वडाअध्यक्ष विष्णु श्रेष्ठको अध्यक्षतामा भएको शिविर उद्घाटन कार्यक्रममा वडाका तिन महिला स्वास्थ्य स्वयम सेविकाहरुलाई सम्मान समेत गरिएको छ । स्वास्थ्य क्षेत्रमा निशुल्क रुपमा घरघरमा पुगेर बर्षौदेखि सेवामा रहेको भन्दै दालचिनी गान्धारी, कालिका पाण्डे र गिता भट्टलाई सम्मान गरिएको हो ।
