गोरखा समाचारदाता
नेपालको प्रसिद्ध धार्मिक स्थल गोरखनाथ गुफामा चलेको १५ औं सवालाख रोट महोत्सव सम्पन्न भएको ।
बैशाख १७ गते बाट सुरु भएको महोत्सव बिहीबार सकिएको आयोजक सिद्धाश्रम शक्तिकेन्द्रले जानकारी दिएको छ । ‘सफलता पूर्वक यस वर्षको महोत्सव पनि सकिएको छ, यसले सम्र्पूण देशवासीको कल्याण हुनेछ भन्ने हाम्रो विश्वास छ’ सिद्धाश्रम शक्ति केन्द्रका संयोजक रामजी अर्यालले भने ।
गुरु गोरखनाथलाई सबै भन्दा मनपर्ने खाद्यबस्तु रोट चढाएपछि बाबा खुसि हुने र देशमा आउने बिख्नबाधा अन्त्य हुने धार्मिक बिश्वास छ । २०६१ साल देखि वर्षेनी हुँदै आएको उक्त महोत्सवमा देशका विभिन्न ठाउँ सँगै विदेशबाट पनि श्रद्धालु भक्तजन आएको आयोजकको दाबी छ ।
गोरखा र आसपासमा हरेक मौसममा नयाँ अन्नवाली भित्रयाउने बित्तिकै वर्षमा २ पटक साउन र मंसिरमा नियमित रुपमा रोट पकाएर गुरु गोरखनाथलाई चढाएर मात्र खाने चलन छ ।
नयाँ अन्नको पिठोलाई घिउमा पकाएर रोट बनाई गोरखनाथलाई अपर्ण गरेर मात्र आफू खाने धार्मिक विश्वास स्थानियमा रहेको गोरखनाथ गुफाका पुजारी प्रदिपनाथ योगीले बताए ।
महोत्सव अवधी भर हरेक दिन हवन, भजन कृतन तथा विभिन्न धार्मिक कार्यक्रमहरु पनि गरिएको आयोजकले जानकारी दिएको छ ।
