नरेन्द्र ढकाल/गोरखा
बैशाख २१ गते । गत आर्थिकमा वर्ष काम सम्पन्न गरेका ४५ योजनाले केही दिनमा भुक्तानी पाउने भएका छन् । आर्थिक वर्ष २०७३÷०७४ मा स्रोत सुनिश्चित भई काम गरेका तर समय मै फरफारक हुन नसकेका योजनाहरुको बजेट फिर्ता भएको थियो । जिल्लाका ४८ वटा त्यस्ता योजनाहरु मध्ये ४५ वटाको रकम निकासा आएको जिल्ला समन्वय समितिले जानकारी दिएको छ । ‘गत आर्थिक वर्षमा माथिबाट अख्तियारी पनि ढिला आयो, उपभोक्ताले काम पनि ढिलो सम्पन्न गर्नुभयो, ७५३ वटा योजना मध्ये ४८ वटाको भुक्तानी हुन सकेन’ स्थानीय बिकास अधिकारी नारायण आर्चायले भने ‘ती मध्ये ४५ वटाको निकासा आएको छ ।’
संघिय मामिला तथा सामान्य प्रशासन मातहतबाट अख्तियारी आएका ४५ योजनाको भुक्तानीको अख्तियारी प्राप्त भएको हो । ती योजनामा भुक्तानी दिनका लागि ५ करोड ४५ लाख रकम निकासा आएको स्थानीय बिकास अधिकारी आर्चायले जानकारी दिए । ‘गत साउन देखिको हाम्रो प्रयास, जिल्ला समन्वय समितिका पदाधिकारीहरुको ताकेता पछि पैसा आएको छ, अहिले पदाधिकारी ज्यूहरु ति योजनाको अनुगमनमा निस्कनुभएको छ’ उनले भने ।
उक्त रकम आएसँगै ती आयोजनाको अनुमन सुरु भएको छ । गत वर्ष भएको काम र कार्यालयमा पेश भएको ।भुक्तानी आदेशलाई आधार मानेर ती आयोजनाहरुको रकम निकास दिने जिल्ला समन्वय समितिको तयारी छ । ‘उपभोक्ताहरुले गरेका कामको प्राविधिक नाप जाँच र मूल्याङ्कन भई हामीका बिल प्राप्त भएका जसको भुक्तानी आदेश भएर कोष तथा लेखा नियन्त्रण कार्यालयमा पठाईएको छ, त्यसैका आधारमा पैसा पाउनुहुन्छ’ आर्चायले भने ।
गत आर्थिक वर्षको असार मसान्तको दिन रातको १२ बजे कोष तथा लेखा नियन्त्रण कार्यालयको सफ्ठ्वयेर बन्द भएपछि भुक्तानी नपाएका योजनाहरुको सो समयमा पेश गरिएको कागजपत्रको आधारमा अहिले भुक्तानी हुने जिससले स्पष्ट पारेको छ । आर्थिक वर्ष सकिएपछि पनि भुक्तानी पाइहालिन्छ भनेर केही योजनामा पछि सम्म काम भएको थियो भन्ने सुनिन्छ त्यस्ताको हकमा के हुन्छ भन्ने हाम्रो जिज्ञासामा स्थानीय बिकास अधिकारी आर्चायले भने ‘नाप जाँच त्यही नै हुन्छ, असार मसान्तमा उठाएको भौचरको मिति मात्र फरक हुन्छ , अनुगमनमा कम देखिए घटाइन्छ, बढ्ने त कुरै भएन ।’
यता जिल्ला समन्वय समितिका प्रमुख अशोक कुमार गुरुङले भने काम नहेरी पैसा नदिने बताएका छन् । गोरखा समाचार सँग कुराकानी गर्दै उनले स्थानीयबाटै कामको अनुगमन गर्नेपर्ने आवाज आएको बताए ‘काम नहेरी त पैसा दिने कुरा भएन, पहिले काम हेछौं, भने जति काम देखियो भने उहाँहरुले रकम पाउनुहुन्छ ।’ अनुगमनका लागि जिल्ला समन्वय समितिका पदाधिकारीहरु अहिले जिल्लाका विभिन्न ठाउँमा पुगेको उनले बताए ।
संघिय मामिला तथा स्थानीय बिकास मन्त्रालय अन्तर्गतका ४५ योजनाको निकासा आएपनि, सस्कृति तथा पर्यटन र युवा तथा खेलकुद मन्त्रालय मातहतका ३ वटा योजनाहरुको भने अहिले सम्म निकासा नआएको आर्चायले बताए । उक्त तिन योजनाको रकम पनि केही दिन भित्र प्राप्त हुने जिल्ला समन्वय समितिले जानकारी दिएको छ । अधिकाशं उपभोक्ता समिति मार्फत सञ्चालन भएका ती योजनाहरुको समयमै भुक्तानी हुन नसक्दा काम गर्ने कामदारहरुले वर्ष दिन हुन लाग्दा समेत ज्याला पाउन सकेका छैनन् ।
