गोरखा समाचारदाता
जिल्लामा सञ्चालन हुने अधिकाशं सवारी साधनले यात्रुलाई आरक्षण सिट उपलब्ध नगराएको भेटिएको छ । जिल्ला प्रहरी कार्यालय अन्र्तगतको महिला तथा बालबालिका सेवा केन्द्र र जिल्ला ट्राफिक प्रहरी कार्यालयको सयुक्त छड्के अनुगमनमा परेका २५ यात्रु बाहक सवारी साधन मध्ये १७ वटाले यात्रुलाई कुनै प्रकारको सहुलियत नदिएको जिल्ला ट्राफिक प्रमुख दयाराम पौडेलले बताए ।
‘हामीले चेकजाँच गरेका २५ वटामा १७ वटाले उक्त व्यवस्थाको पालना नगरिएको पाइयो’ उनले भने ‘ती मध्ये पनि ५ वटा यात्रु बाहक सवारी साधनमा आरक्षण सिट व्यवस्था नै गरिएको रहेछ ।’ नेपाल सरकारले व्यवस्था गरेको महिला, अपाङ्गता र जेष्ठ नागरिकका लागि अनिवार्य छुट्याउनु पर्ने आरक्षण सुबिधा नपाएको भन्दै यात्रुहरुले गुनासो गरेपछि प्रहरीले छडेक चेकजाँच गरेको हो ।
महिला तथा बालबालिका सेवा केन्द्रकी शाखा प्रमुख प्रहरी निरीक्षक कमला नरालको नेतृत्वमा गएको टोलीले आरक्षण व्यवस्था कार्यान्वयन नगर्ने सवारी साधनको कागजपत्र नियन्त्रणमा लिएको छ । ती सवारी सधानलाई कानून अनुसार कारबाही गर्ने पौडेलले बताएका छन, ‘कागजपत्र नियन्त्रणमा लिएका छौ, ती सबै सवारी साधनको कसुर हेरेर कारवाही गछौं ।’
यातायात व्यवस्था ऐन २०४९ बमोजिम कारवाही प्रकृया अगाडी बढाएर कसुरका आधारमा ५ सय, एक हजार र १५ सम्म जरिवाना असुल गर्न गरिने उनले बताए । सोही अबसरमा ध्वनी प्रदुषण गरी ठुलो अवाज निकाले चलाइएका दुई वटा मोटरसाईकल पनि प्रहरीले नियन्त्रणमा लिएको छ । केही वर्ष अघि जिल्लाका सबै यात्रुबाहक सवारीमा आरक्षण सिट र यात्रु क्षमता निर्धारण गरिएको भए पनि पालनमा व्यवसायीले अटेर गर्दै आइरहेका छन् ।
उक्त व्यवस्था कार्यान्यनमा प्रहरीले पनि चासो नदेखाएको यात्रुहरुको आरोप छ ।
