गोरखा समाचारदाता
जिल्ला जनस्वास्थ कार्यालय मातहत रहेका स्वास्थ्य संस्था स्थानीय तहलाई बुझाइएको छ । स्थानीय तहको निर्वाचन पछि गत कार्तिक २८ गते नेपाल भरका स्थानीय तह मातहत रहने कार्यालयको स्वामित्व ६ महिना भित्र हस्तान्तरण गर्ने कार्यविधी अनुसार जनस्वास्थ्यले स्वास्थ्य संस्था स्थानीय तहलाई बुझाएको हो । ‘अर्थ मन्त्रालयले गत कार्तिकमा २८ गते जिल्ला जनस्वास्थ्य सहित अन्य कार्यालयहरुको स्वामित्व ६ महिना भित्र हस्तान्तरण गर्नु पर्ने कार्यविधि बनाएको थियो सोही अनुसार उहाँहरुलाई बुझाएका हौं’ जिल्ला जनस्वास्थ्य प्रमुख केदारराज पराजुलीले भने ।
नेपालमा संघियता लागु भएर स्थानीय तह निर्वाचन भएसँगै विषयगत सरकारी कार्यालयको शसर्त अनुदान स्थानीय तहको खाता पठाइएको छ । आर्थिक, भौतिक र जनशक्ति व्यवस्थापनको स्वामित्व पनि स्थानीय तहलाई हस्तान्तरण गर्ने राज्यको निति अनुसार स्वास्थ्य संस्था हस्तान्तरण गरिएको हो । ‘हामीले आर्थिक, भौतिक, तथा जनशक्ति व्यवस्थापनको सम्पुर्ण अधिकार उहाँहरुलाई सुम्पेका छौ, केही प्राविधिक कुरा बाँकी छन्’ पराजुलीले भने ‘जिल्ला जनस्वास्थ कार्यलयमा एउटा प्राविधिक बडी हुन्छ, हामी उहाँहरुाई सहयोग र समन्वय गछौं ।’
सोमबार जिल्ला जनस्वास्थ्य कार्यालयमा भएको एक कार्यक्रमका वीच स्थानीय तहका प्रमुखहरुले स्वास्थ्य संस्थाका फाइल र आवश्यक कागजपत्र बुझेका हुन् । फाईल बुझ्दै उनीहरुले जिल्ला जनस्वास्थ्यले प्रदान गर्नेे सेवालाई थप प्रभावकारी बनाउँदै स्थानीय स्तरमा आवश्यकता आधारमा अघि बढ्ने बताएका छन् । ‘जनस्वास्थ्यले दिएको सेवामा कमि हुन दिदैनौं, थप के गर्न सकिन्छ, अध्ययन गरेर जनताको सेवा गछौं’ सिरानचोक गाउँपालिकाको अध्यक्ष राजु गुरुङले भने ।
स्थानीय तहको निर्वाचन भए लगतै स्वास्थ्य क्षेत्रलाई विशेष महत्वका दिएर काम गरेको भन्दै उनले केही प्राविधिक समस्या देखिए पनि स्वास्थ्य क्षेत्रलाई थप प्रभावकारी बनाउने दाबी गरे । भ्याक्सिन व्यवस्थापन र स्वास्थ्यकर्मीको तालिम, गोष्ठी लगायतका कुरा गर्न तत्काल स्थानीय तह केही समस्या रहेको गुरुङको भनाई छ ।
यता जिल्ला जनस्वास्थ्य कार्यालयले भने स्थानीय तहलाई चाहिने प्राविधिक सहयोग उपलब्ध गराउने प्रतिवद्धता व्यक्त गरेका छ । ‘भ्याक्सिन व्यवस्थापनको काम निकै जटिल छ, अहिले उहाँहरुले उक्त कार्य गर्न सक्नु हुन्न त्यसलाई हामी जिल्ला बाट समन्वय गर्छै’ जिल्ला जनस्वास्थ्य प्रमुख पराजुलीले भने ।
