काठमाडौँ, फागुन २२ गते । प्रमुख राजनीतिक दलका संसदीय दलका नेताहरूले प्रतिनिधिसभाको मङ्गलबारको बैठकलाई सम्बोधन गर्नुहुने भएको छ । प्रतिनिधिसभामा प्रतिनिधित्व गर्ने पाँचवटै राष्ट्रिय दल तथा स्वतन्त्र सांसदहरूले संसद्मा सम्बोधन गर्न लाग्नुभएको हो । प्रतिनिधिसभा बैठक मङ्गलबार बिहान ११ बजेका लागि बोलाइएको छ । सोमबार अधिवेशन सुरु भएकै दिन सम्बोधन गर्ने तयारी भए पनि पाकिस्तानी प्रधानमन्त्रीको नेपाल भ्रमणको कार्यतालिका र संसद् बैठक एकै समयमा परेपछि मङ्गलबारका लागि सम्बोधनको समय तोकिएको हो ।
मङ्गलबार सबै दलका संसदीय दलका नेताहरूले नै सम्बोधन गर्ने भए पनि एमाले संसदीय दलका नेता एवं प्रधानमन्त्री केपी शर्मा ओलीले भने सम्बोधन गर्नुहुनेछैन । एमालेका तर्फबाट वरिष्ठ नेतामध्ये एकले सम्बोधन गर्नुहुनेछ । एमाले संसदीय दलका पूर्व प्रमुख सचेतक एवं सांसद भानुभक्त ढकालले प्रधानमन्त्री ओलीले सम्बोधन नगर्ने बताउनुभयो ।
ढकालले भन्नुभयो, “सबै दलका संसदीय दलका नेताहरूले सम्बोधन गर्ने कार्यतालिका रहेको छ तर प्रधानमन्त्रीले सम्बोधन गर्नुहुन्न ।एमालेका तर्फबाट पूर्वप्रधानमन्त्रीमध्ये एकले सम्बोधन गर्नुहुन्छ । ” प्रतिनिधिसभामा प्रतिनिधित्व गर्ने पाँच राष्ट्रिय दलमध्ये नेपाली काँग्रेस, नेकपा (एमाले), नेकपा (माओवादी केन्द्र) र सङ्घीय समाजवादी फोरम नेपालले संसदीय दलको नेता चयन गरिसकेका छन् । काँग्रेसले पार्टी सभापति शेरबहादुर देउवालाई दलको नेतामा चयन गरेको छ । यस्तै माओवादी केन्द्रका अध्यक्ष पुष्पकमल दाहाल ‘प्रचण्ड’ स्वयं संसदीय दलको नेता हुनुहुन्छ । फोरम नेपालका उपेन्द्र यादव संसदीय दलको नेता चयन भइसक्नुभएको छ । राष्ट्रिय जनता पार्टी नेपालको संसदीय दलको नेताको चयन हुन बाँकी छ । संसद्मा राष्ट्रिय दलका नेतासहित स्वतन्त्र हैसियतमा रहनुभएका नयाँ शक्ति नेपालका डा. बाबुराम भट्टराई, नेपाल मजदुर किसान पार्टीका प्रेम सुवाल तथा राष्ट्रिय प्रजातन्त्र पार्टीका राजेन्द्र लिङ्देनले मङ्गलबारको संसद्लाई सम्बोधन गर्नुहुनेछ ।
gorkhapatraonline
