अन्तर्राष्ट्रिय विकासमन्त्री पेनी मोर्डन्टले हेइटीमा भूकम्पपछि सन् २०११ मा त्यहाँ गएका बेला सहयोग गर्ने क्रममा अक्सफामका केही कर्मचारीको व्यवहार डरलाग्दो भएको भन्दै त्यसको निन्दा गरेकी हुन्।
अक्सफामका केही कर्मचारीले भूकम्पका बेला पीडितहरूलाई मद्दत गर्दा यौनकर्मीहरूको प्रयोग गरेका बताइएको छ।
मोर्डन्टले ब्रिटेनमा रहेका परोपकारी संस्थाहरू जसले सरकारसँग पैसा लिन्छन् उनीहरूलाई सुरक्षा नीति अनुसार काम गरिरहेको प्रत्याभूति गर्ने उपाय के छ भनेर पत्राचार गर्ने बताइन्।
अक्सफामलाई गत वर्ष सरकारले ४ करोड ४० लाख डलर दिएको थियो।
लण्डनमा रहेका हेइटीका राजदूत बोसित एडमण्डले अक्सफामले उक्त प्रकरणलाई ढाकछोप गर्न खोजेको भन्दै सार्वजनिक माफी माग्नुपर्ने बताएका छन्।
निगरानी गर्ने संस्था द च्यारिटी कमिशनले सन् २०११ मा हेइटीमा आफ्ना केही सहायताकर्मीहरूले यौनकर्मीहरूलाई प्रयोग गरेको भन्नेबारे पूर्ण विवरण अक्सफामले नदिएको बताएको हो।
उक्त संस्थाले आफूले अनुचित यौन दुर्व्यवहार, उत्पीडन र कर्मचारीको धाकधम्कीबारे अनुसन्धान गरिरहेको बताएको थियो।
संस्थाले त्यसपछि कुनै कारबाही थालेन तर यदि आफूलाई पहिल्यै सबै तथ्य थाहा भएको भए फरक तरिकाले कारबाही थाल्ने बताएको छ।
४ जना कर्मचारीलाई बर्खास्त र तीनजनालाई राजीनामा दिन लगाएको अक्सफामले भने आफूले केही कुरा नलुकाएको बताएको छ।
सन् २०१० मा हेइटीमा दुई लाख मानिसहरूको ज्यान जाने गरी आएको ७.० म्याग्निट्यूडको विनाशकारी भूकम्पपछि राहत कार्यक्रम अन्तर्गत अक्सफामका सहायताकर्मीहरू हेइटी गएका थिए।
BBC
