२३ पुस, डोटी । लामो समयसम्म वर्षा नहुँदा खानेपानीको मुहान समेत सुक्न थालेपछि जोरायल गाउँपालिका-४ बाँजिलेकवासीले पानी पारिदिन भन्दै भगवतीलाई बोको बली दिएका छन् ।
करिब ६५ घरधुरी रहेको बाँजिलेकमा सञ्चालित खानेपानीको योजनामा खडेरीका कारण पानी कम भएपछि चिन्तित स्थानीयवासीले पानी पारिदिने आशमा भगवतीको पूजासहित बोको बली दिएका हुन् ।
पानी सुक्दै गएपछि गाउँबाट करिब एक घण्टाको दुरीमा रहेको मुहानबाट पानी बोकेर खानुपर्ने अवस्था आएको स्थानीय शिक्षक भोजबहादुर थापाले बताए । उनले भने-‘गाउँ समाजको कुरा हो, वर्षा रोकिएको लामो समय भयो, गाउँमा खानेपानी र खेतिपातीका लागि समस्या देखियो । परम्परागत विश्वास अनुसार गाउँमा सबैले भगवतीको पूजा गर्ने सल्लाह भएर पञ्चमीको तिथीमा पूजा गरिएको हो ।’संकटका बेला भगवान सम्झिने परम्परागत विश्वास अनुसार बोका चढाएर मालिकामाई भगवतीको पूजाआजा गरिएको स्थानीयवासीले जनाएका छन् ।
पहिलेका दिनहरुमा भगवती पूजामा बाख्राका पाठी र कुखुराका चल्लाले पूजा गरिंदै आएकोमा आजकाल भने बोका काटेरै पूजा गर्न थालिएको थापाले बताए ।
विगतका वर्षहरुमा पनि सुख्खा मौसममा भगवती पूजा गर्ने गरिएको र पूजा गरिरहेकै बेलामा पानी पर्ने गरेकाले स्थानीयमा विश्वास कायम रहिआएको बुढापाकाहरुको भनाइ छ ।
पानी नपरेका कारण अहिले बालीनालीमा समस्या भइरहेको तथा अब फलफूलको फूल्ने बेला भएकाले फलफुलका लागि पनि सिचाइँं समस्या देखिने जिल्ला कृषि विकास कार्यालय डोटीका बरिष्ठ कृषि विकास अधिकृत तपेन्ऽबहादुर शाहले बताए । उनले भने-‘गहुँबाली र अन्य बालीनालीमा हालसम्म शीत र पूरानो चिस्यानले काम गरेको थियो, अब तत्काल पानी परेन भने झनै समस्या हुने देखिन्छ । जिल्लाका बेशी क्षेत्रभन्दा माथिल्लो भेगमा बढी समस्या हुन्छ ।’
यस वर्ष मनसुनी वर्षा सकिए पश्चात गत कात्तिक पहिलो साता परेको हल्का पानीले केही राहत भएता पनि त्यस यता पानी परेको छैन । स्थानीयवासीले पानी पर्ने आशमा भगवतीलाई बली दिएका छन् ।
onlinekhabar
