कैलाशबाबु श्रेष्ठ/गोरखा
असोज १ गते । जिल्लाबाट फ्रिज भएको रकम पुनः फिर्ता ल्याउने पहल सुरु भएको छ । गत आर्थिक वर्ष भित्र काम सम्पन्न गरेका तर समय भुक्तानी नपाएका ४८ योजनाको ६ करोड रकम फिर्ता नभएको भन्दै उपभोक्ताहरु आन्दोलन सुरु गर्ने तयारी गरेपछि जिल्ला समन्वय समितिले रकम फिर्ताको पहल थालेको हो । ‘हामीले बारम्बार उक्त रकम फिर्ता पठाउन मन्त्रालय र विभागसँग समन्वय गरिरहेका छौ’ स्थानीय विकास अधिकारी नारायण आर्चायले भने ।
रकम फिर्ता ल्याउन पहल नगरेको भन्दै उपभोक्ताहरुले आईतवार समन्वय समितिमा तालाबन्दी गर्ने तयारी गरेपछि जिल्ला समन्वय समितिले एक टोली काठमाण्डौ पठाउने तयारी गरेको छ ।‘डिही सापको नेतृत्वमा एक टोली आईतबार राजधानी जाँदै हुनुहुन्छ’ स्थानीय विकास अधिकारी आर्चायले भने । जिल्ला प्राविधिक कार्यालयका सिनियर डिभिजन इन्जिनियर होमनाथ पौडेलको नेतृत्वमा ५ सदस्य टोलीले काठमाण्डौ गएर स्थानीय बिकास मन्त्रालय र विभागसँग आवश्यक समन्वय गर्ने जिम्मेवारी दिईएको छ ।
‘पैसा आउछ तर ढिलो चाँढो भन्ने मात्र हो,सरकार चुनावको तयारीमा छ, निर्वाचन आचारसहिता पनि लागेको छ’ आर्चायले भने । यता उपभोक्ताले तालाबन्दी सहितका आन्दोलका कार्यक्रमहरु घोषणा गरेर शुक्रबार ज्ञापनपत्र बुझाएपछि सरकारी अधिकारीहरु तातेका हुन् ।
रकम प्राप्त नहुदाँ सम्म हामी भूक्त्तानी दिन सक्दैनौ त्यसैले बार्ता पछि एक टोली अर्थ मन्त्रालय जाने र आईतबार देखि हुने तालाबन्दी रोक्ने बारेमा उहाँलाई आग्रह गरेका छौ’ स्थानीय विकास अधिकारी आर्चायले भने । आइतबार अर्थ मन्त्रालयमा जिल्लाका सांसद तथा राज्य मन्त्रिहरुले समेत सहभागीतामा छलफल गर्ने कार्यक्रम तय गरिएको छ ‘हामीले कामको अनुगमन गरयौ, काम सम्पन्न भै सकेको छ यहाँको समस्याका बारेमा मन्त्रालय जानकार नहुदाँ ढिला भएको हो’ उनले भने ।
गुम्बा, छात्राबास भवन, सिंचाई आयोजना, खानेपानी तथा सडक जस्ता योजनाहरु सम्पन्न हुदाँ पनि भूक्त्तानीमा लापरवाही भएपछि ४८ विभिन्न योजनाको ६ करोड १८ लाख ८ हजार २ सय १९ रुपैयाँ एक्काईस पैसा फ्रिज भएको हो ।
