मोहसिन अलि मियाँ/गोरखा
असार १२ गते । मुस्लिम समुदायको एक महिने रमजानको व्रत आज सकिएको छ । गएको जेठ १४ गतेबाट सुरु भएको व्रत आइतबार बेलुकी सकिएको छ । इस्लाम धर्मालम्बीहरुले बाह्र महिना मध्ये सबैभन्दा सर्वोत्कृष्ठ महिनाको रुपमा मान्ने अरबिक रमजानको महिनाभर व्रत बस्ने प्रचलन छ ।
रमजानको रोजा सकिए लगत्तै मुस्लिम समुदायको दैनिकीमा समेत परिवर्तन आएको छ । मुस्लिम समुदायले बिहान २ बजेदेखी खाना पकाउन सुरु गरेर ३ः३० बजे खाइसक्नुपर्ने दैनिकी आजबाट सकिएको छ ‘हिजोसम्म बिहान २ बजे नै उठेर खाना पकाउनु पर्थो, आजबाट उठ्नु पर्दैन अब’ गोरखा नगरपालिका वडा नम्बर २ कि अमिना खातुनले भनिन् ।
सेहरी खाएसंगै विहानको नमाज पढेर घरको काममा लाग्ने गरेको बताउने अमिनालाई १ महिने रमजान सकिएकोमा दुखी र खुसी दुवै भएको बताउछिन् । ‘रोजामा खानै नपाए पनि आनन्द हुन्थ्यो, बिहान सबेरै खाए पछि दिनभर खानको टेन्सन नै हुदैनथ्यो’ खातुनले भनिन, ‘बिहान खाएर काममा निस्के पछि एकै चोटी बेलुका आए पनि हुने, तालिका खुब मिलेको थ्यो’ गाइखुरकी अमिनाको जस्तै गोरखा नगरपालिका वडा नम्बर ६ कि नेहरुन निशाको पनि आजबाट दैनिकी फेरिएको छ ।
‘सेहरी खाएर नमाज पढ्यो, एक छिन आराम गरेर पसलमा गए पछि एकै चोटी बेलुका घर आउने हो’ गोरखा बसपार्कमा फेन्सी पसल भएकी मियाँ भन्छिन्, ‘अरु बेलामा त दिनको ६/७ पल्ट घर र पसल गर्नु पर्छ रोजामा ढुक्कै’ भिमसेन गाउँपालिका वडा नम्बर ६ का मोहम्मद इशाक पेशाले शिक्षक हुन् । हिन्दु र मुस्लिम दुवै समुदायका विधार्थी पढ्ने अश्राङकै नव जार्गती चण्डी मावीमा पढाउने उनि दिनभर भोकै बसेर पनि विधालयमा पढाउन छोडेनन् । पानीसम्म पनि नखाई बस्ने व्रतमा पढाउन केही दिन असहज महसुस भए पनि केही दिन पछि भोकको मतलबै नहुने उनको अनुभव छ ।
अरबिक क्यालेण्डर अनुसार नवौ महिना रमजान भर व्रत बसेर अल्लाहको बढि भन्दा बढि प्राथना गरेमा लोक परलोक दुवैमा फाइदा हुने मुस्लिम समुदायका धार्मिक गुरुहरु बताउछन् ।
अरु महिना भन्दा यो महिनालाई सर्वोत्कृष्ठ महिनाको रुपमा रमजानलाई लिने गर्दछन् । इस्लाम धर्मको पवित्र धार्मिक ग्रन्थ कुरान यहि महिनामा अवतरित भएकाले पनि यो महिनाको महिमा बढेको हो भन्छन् गोरखा नगरपालिका–२ का सबुर बकस मियाँ । रमजानमा मात्र पढिने अतिरीक्त तरावीको नमाज पनि आजबाट पढ्न नपर्ने मियाँको भनाई छ । बेलुका करिब १० बजेसम्म मस्जिदमै गएर पढिने उक्त नमाज अन्य महिनामा पढ्नु नपर्ने उनको भनाई छ ।
यस बर्षको रमजानको एक महिने व्रत सकिए संगै जिल्लाका मुस्लिम बस्तिहरुमा इदको रौनक बढेको छ । गोरखा घर भइ जिल्ला बाहिर बस्ने तथा विदेशबाट घर आउनेको संख्या पनि केही दिन देखि बढेको छ । एक महिनासम्म पानीसम्म पनि नखाई व्रत सफलपुर्वक सम्पन्न गरेर आज मुस्लिम समुदायले इद उल फित्र पर्व बनाउदैछन् । को रमझमले अहिले मुस्लिम बस्तीहरु निक्कै तातेको छ ।
यस संगै सरकारले इद पर्वको अवसरमा सार्वजानिक विदा समेत दिएको छ ।
