गोरखा समाचारदाता
साढे ११ महिनामा सम्पन्न हुन नसकेका विकास निर्माणका काम अबको १५ दिनमा सम्पन्नगर्ने गरी रकम सिध्याउन गोरखा विकासे अड्डा, र उपभोक्ता समितिहरू कस्सिएका छन् । समय छउन्जेल आलटाल र आफ्ना मान्छेलाई कार्यक्रम पार्ने ध्याउन्नमा रहेका विकासे अड्डा र विकासका काम गर्छौं भनी जिम्मेवारी दिने उपभोक्ता समिति अन्तिम समय भए पछि काम भ्याउन तछाड मछाड गरिरहेका छन् ।
‘वर्ष भरी काम ओगेटर बसे अहिले काम भन्दा कागज मिलाउन नै व्यस्त छन्, यसरी के विकास हुनु’ सिरानचोकका गंगा लामाले भने ।उपभोक्ता समितिका मान्छे र विकासे अड्डाका विकास निर्माण हेर्ने कर्मचारीलाई जिल्ला समन्यव समिति, नगरपालिका, र गाउँपालिका तथा वडामा कागज मिलाएर बजेट सक्न निकै चटारो परेको छ । वर्ष भरि गर्न नसकेको काम १५ दिनमा सक्न सम्भव नभएको कतिपय उपभोक्ताको तर्क छ । बिकासे अड्डाहरुले पनि कामको प्रगति भन्दा सम्झौता गरेका बजेट सक्न ध्यान दिनेको कर्मचारीहरु नै स्वीकार गर्छन ‘बजेट फ्रिज हुन दिन भएन कार्यालयले सम्झौता त गरेको छ काम सक्न नसक्ने त उहाँहरुमा भर पर्छ,’ जिल्ला समन्यव समिति एक कर्मचारीले भने ।
साबिकको जिल्ला विकास समिति मार्फत झण्डै २५ करोडको बजेट स्थानिय योजनाहरुमा विनियोजन भएको छ । सडक, विद्युत, स्वास्थ्य, कृषि, भवननिर्माण, सिपविकास लगायतका शीर्षकहरुमा बाँडफाड भएको उक्त बजेट अन्र्गगत केहीदिन अघि देखि मात्रकाम सुरु भएको हो । वर्षेनी आर्थिक वर्षको अन्त्यतिर मात्र काम गर्ने परिपाटीले बिकास निर्माणका काम प्रभावकारी नभएको गुनासो बढि रहेको बेला यस वर्ष भने स्थानिय निर्वाचनले समेत प्रभावित तुल्याएको थियो ।
‘सधै वर्खा लागे पछि मात्र काम गर्ने गर्छन, यस वर्ष त झन चुनावले पनि काम गर्न ढिला भयो’ सुलिकोटका शम्सेर गुरुङले भने । कुल ५७३ योजनाहरु जिल्ला समन्वय समितिमा स्वीकृत भएको करिव ५५० भन्दा बढि योजना सम्झौता भएको योजना शाखाले जानकारी दिएको छ ।‘अधिकाशं योजनाहरु सम्झौता भएका छन्, विकास निमार्ण बाहेकका केही योजनाहरु सम्झौताको चरणमा छन’ स्थानिय विकास अधिकारी आर्चायले भने । फर्निचर खरिद, कार्यालयहरुका लागि सहयोग जस्ता र्शीषकका योजनाहरु भने अझै सम्झौता भई काम भईरहेको जिल्ला समन्वय समितिको दाबी छ ।
निर्वाचन क्षेत्र पुर्वाधार विकास कार्यक्रम अन्र्गत पनि काम भईरहेको कर्मचारीहरुले बताएका छन् । क्षेत्र नम्बर २ मा भने उक्त रकम विद्युतको पक्की पोल खरिदमा र्खच गरिएको छ । जिल्लाका ३ स्थानमा पोल खरिद गरि राखिएको र केही दिन भित्र आवश्यकताका आधारमा वितरण गर्ने जिल्ला समन्वय समितिको तयारी छ । ‘माननियहरुले बैठक बसेर बाँडफाँडको टुंगो लगाउनु हुन्छ अनि हामी पोल बाड्छौ’ स्थानिय विकास अधिकारी आर्चायले भने ।
स्थानियतह सँगै कृषि, स्वास्थ्य, शिक्षा, सिञ्चाइँ, पशु सेवाकार्यालय, सडक, विद्युत लगायतका विषय गतकार्यालयलाई पनि यस वर्ष स्वीकृत भएको कार्यक्रम सम्पन्न गर्न भ्याईनभ्याई छ । आर्थिक वर्ष सकिन लाग्दा यसरी भएका विकास निर्माणका काम प्रभावकारी नभएको सेवाग्राहीले गुनासो गरेका छन् । ठेकेदार र कर्मचारीहरुको मिलेमतोमा काम भएको उपभोक्ताको गुनासो छ । नियमन निकायको भुमिका कमजोर भएको देखिन्छ । ‘फिल्डमा कस्तो कामभएको छ, हेर्ने कोही आउँदैन्, ग्राबेल गरिएको बाटोको अवस्था यस्तो छ’ सिरोचोक गाउँपालिका अन्तर्गत चोरकोट छोप्राक हुँदै भच्चेक जाने बाटोमा गरिएको काम देखाउँदै स्थानिय शिवहरी पोखरेलले भने । यता स्थानिय विकास अधिकारी आर्चायले भने अनुगमनको पाटोलाई शसक्त पारिएको दाबी गरेका छन् । ‘प्राविधिक साथिहरु फिल्डमा हुनुहुन्छ, हामी पनि गएर हेरेका छौं जिल्लाको काम सन्तोजनक छ’ आर्चायले भने । केही क्रमगत योजना बाहेक अरुमा काम सम्पन्न हुने उनको दाबी छ ।
