फाइल फोटो
गोरखाः नेपाली कांग्रेसका सभापति शेरबहादुर देउवाले वर्तमान सरकारले नै स्थानीय निकायको चुनाव गराउने बताएका छन् ।
नेपाली कांग्रेस क्षेत्र नं २ गोरखाले पालुङटार नगरपालिकाको ठाँटीपोखरीमा गरेको आमसभालाई सम्बोधन गर्दै कांग्रेस र माओवादीको वर्तमान सरकारले स्थानीय निकायको निर्वाचन गराउने उनले बताए ।
संविधानले निर्धारण गरेको समयभित्रै तीनवटै संरचनाको निर्वाचन गर्नुपर्नेमा उनले जोड दिए । ‘स्थानीय निकायको निर्वाचन अहिलेको आबश्यकता हो’, उनले भने, ‘प्रदेश र संसदको चुनाव गराउन पनि स्थानीय निकायको चुनाव जरुरी छ ।”
संविधान संशोधन गरेर मधेसवादी दललाई सहमतिमा ल्याउन वर्तमान गठबन्धनले प्रयास गरिरहेको उनले बताए । ‘हिमाल, पहाड र तराईलाई जोड्नका लागि संविधान संशोधन आबश्यक छ । हामीले छलफलमा तीब्रता दिएका छौँ”, देउवाले भने ।
स्थानीय निकायको निर्वाचनमा कांग्रेसको बहुमत ल्याउनका लागि तयारीमा जुट्न पनि उनले कार्यकर्ताहरुलाई निर्देशन दिएका छन् ।
karobardaily