टीकाराम तामाङ

पुस २२, २०७३- नेकपा एमालेका अध्यक्ष केपी ओलीले सरकार आयु लम्ब्याउन लागेको आरोप लगाएका छन् । काठमाडौंमा बिहीबार एमालेसहित विपक्षी दलहरुले आयोजना गरेको विरोध प्रदर्शनमा सम्बोधन गर्दै ओलीले सरकार संविधान कार्यान्वयन, निर्वाचन गर्नतिर भन्दा आयु लम्ब्याउन लागिपरहेको आरोप लगाएका हुन् । उनले विभिन्न तहको निर्वाचन गर्नका लागि ११ महिनाभन्दा बढी समय नभएको भन्दै त्यसभित्र निर्वाचन गर्न नसकेमा संवैधानिक संकट निम्तिने बताए ।

अध्यक्ष ओलीले सरकारले निर्वाचन गर्नतिरभन्दा कुनै सरोकार नभएको विषय संविधान संशोधन अगाडि बढाउन लागेको बताए । उनले भने, ‘संशोधन कुनै सकारोकार नभएको विषय हो, संशोधनले निर्वाचनलाई कतै सहयोग पुर्‍याउँदैन ।’

हिजो संविधान जारी गर्न नदिने, संविधान, जलाउनेहरु च्यात्नेहरुहरुले फेरि देशलाई अप्ठेरोमा पार्न खोजिरहेको आरोप लगाए । मधेस केन्द्रित दलहरुप्रति इंगित गर्दै उनले भने, ‘देशलाई प्रहार गर्ने, सार्वभौमसत्तामाथि प्रहार गर्ने अत्यन्तै गम्भीर षड्यन्त्र भइरहेको छ ।’

उनले सरकारले ल्याएको संविधान संशोधन विधेयक राष्ट्रहित विपरीत रहेको भनाइ दोहोर्‍याए । त्यो प्रस्ताव संसदबाट पारित हुन नदिने भन्दै यसको विरोधमा देशभर जागरण पैदा गर्ने उनले बताए । सम्बोधनका क्रममा ओलीले भने, ‘संशोधनको विरोधमा काठमाडौं जागेको छ, उपत्यका जागेको छ, अब हिमाल, पहाड, तराई, पूर्व–पश्चिमसहित देशभर जागरण ल्याउनुपर्छ’ । उनले तराई र पहाडबीच अविश्वास खडा गर्ने खेल भइरहेको पनि बताए ।