आश गुरुङ, लमजुङ

सत्ताधारी दलको छायाँयुद्धले मुलुकमा राजनीतिक अस्थिरता बढेको पूर्व प्रधानमन्त्री तथा नयाँ शक्ति पार्टी नेपालका संयोजक डा. बाबुराम भट्टराइले बताएका छन् ।

भट्टराईले तीन ठूला राजनीतिक दलका नेताहरु सर्प, भ्यागुता र बिच्छीको खेलजस्तो आफूबीच खेलिरहेको आरोप लगाए । पार्टीले बेंसीसहरमा आयोजना गरेको अन्तरसंवाद कार्यक्रममा सहभागी हुन आएका डा. भट्टराईले बिहीबार नेपाल प्रेस सोसाइटी जिल्ला शाखाद्वारा आयोजित पत्रकार भेटघाटमा भने, ‘तीन राजनीतिक दलबीच मुद्दागत एजेण्डामा कुनै मतभिन्नता छैन । म तीनैजना नेतालाई राम्रोसँग चिन्दछु । यस्तो अवस्था सत्ता बाँडफाँडमा आएको अविश्वासले भएको हो ।’

पहिले कांग्रेस र एमालेले सत्ता साझेदारमा समझदारी गर्दा सुशील कोइरालाले तोडेको र त्यो झोंकमा प्रचण्डलाई साथ लिएर केपी ओलीले सरकार बनाएको बताए । त्यो झोंक फेर्न ओली सरकार गिराएर कांग्रेसले प्रचण्डलाई आफूतिर ल्याएको उनले दाबी गरे ।

‘अहिले प्रचण्डजी र शेरबहादुरजी बीचमा ९/९ महिना बाँड्ने समझदारी छ । ९ महिनामै नछोड्ने हो कि भन्ने शेरबहादुरजीलाई शंका छ,’ उनले भने, ‘प्रचण्डजीलाई पनि लोभ्याउने कुरा होला, यस्तो अदृश्य छायाँयुद्धले देश संकटमा जान्छ । त्यसैले छायाँयुद्ध नगर्नोस् भनेर म आग्रह गर्न चहान्छु ।’

उनले मधेसी, थारु, आदिवासी जनजातिलाई संविधानको स्वीकार्यतामा ल्याउने कुरा महत्वपूर्ण रहेको बताए । ‘तीन दलले सत्ता साझेदारी टुंग्याई छिटो संविधान संशोधन गरेर अगाडि बढ्नुको विकल्प छैन,’ उनले भने, ‘संविधान संशोधन हुनुपर्छ, तर, अहिलेको प्रस्ताव पास गरेर काम छैन, यो सर्वस्वीकार्य छैन ।’

उनले अहिलेको प्रस्तावलाई परिमार्जन गरिए सबै राजनीतिक दलले स्वीकार्ने दाबी गरे । ‘प्रचण्डजी, ओलीजी साथै मधेसवादी दलका नेतासँग भेटेर मैले छलफल गरिसकेको छु । परिमार्जनको बीचबाटोमा सबै आउन आवश्यक छ,’ उनले भने । सबैलाई ‘फेस सेभिङ’ चाहिएकाले यसमा केही ढिलाई हुनसक्ने उनले बताए ।

‘हामीले मधेसवादी दलका माग, थारु साथै आदिवासी जनजातिका माग सम्बोधन नगरी सुखै छैन,’ उनले भने, ‘सबै मागहरु संशोधन गर्न नसकिएला । तर, जातीय, क्षेत्रीय, लैंगिक विविधतालाई समेट्नुपर्छ ।’

एमालेलाई सर्वोच्चको फैसलाले बाटो खोलिदिएको भन्दै उनले संसदको गतिरोध अन्त्य गर्नतर्फ लागेमा एमालेलाई राम्रो हुने सुझाए ।

राज्य पुनर्संरचनाको समिति र आयोगले दिएको सुझाव १० प्रदेशलाई कार्यान्वयन गरेको भए सीमांकनमा अहिलेको समस्या नआउने उनले दाबी गरे ।

‘अहिले ७ प्रदेश भयो । १० प्रदेश भएको भए यो विवाद आउने नै थिएन,’ उनले भने, ‘नमिलेका ३ ठाउँको सीमांकन मिलाउन पनि खासै समस्या छैन, नेताहरुमा जाँगर हुन आवश्यक छ ।’

एक अर्को प्रशंगमा उनले अबको चुनावबाट नयाँ शक्ति पार्टी वैकल्पिक शक्तिको रुपमा उदाउने बताए । ‘पार्टी स्थापना भएको ७ महिनामा ७५ जिल्लामा संगठन बनिसकेको छ । विदेशमा पनि संगठनहरु बनिरहेका छन् । आउँदो एक वर्षभित्र वैकिल्पक शक्तिको रुपमा नयाँ शक्ति उदाउने छ । हाम्रो ६ महिने अभियान यसैका लागि हो,’ उनले भने ।