विनीता मरहट्टा

लोकदोहोरी गीतका भिडियोमा कुनै उतारचढाव बिना १० वर्षदेखि आफ्नै रफ्तार कायम गरेकी अभिनेत्री हुन्, रञ्जिता गुरुङ । पढाइको सिलसिलामा काठमाडौं आएपछि उनी गोंगबुस्थित गोर्खा कला केन्द्रमा नृत्य सिक्न थालिन् ।

कुनै टप मोडल बनुँला वा अभिनेत्री बनुँला भन्ने सोचले नभई खाली समयको सदुपयोग गर्न उनले नृत्य सिकेकी थिइन् । गोरखाको थालाजुङमा हुर्केकी रञ्जिताको सपना र पहुँचभन्दा पर थियो चलचित्र जगत । ‘यो ठाउँको कल्पना मेरा लागि टाढाको कुरा थियो’, उनले भनिन् ।

शंकर बीसीको निर्देशनमा ‘घामछाया’ बोलको लोकदोहोरी गीतमा पहिलो पटक मोडलिङ गरिन् । त्यतिबेला उनले भन्दा अरूले उनमा विश्वास गरे । भनिन्, ‘सुरुमा एकदम होपलेस भएँ, नर्भस थिएँ तर दाइहरूले राम्रोसँग सिकाउनुभयो ।’ अहिले आधुनिक र लोकदोहोरीको म्युजिक भिडियोमा उनलाई भ्याइनभ्याइ छ । करियर सुरु भएको केही वर्षमै उनले विवाह गरिन् ।

श्रीमान् बेलायतमा थिए । कहिलेकाहीँ उतै गएर पनि बस्थिन् । तर उनलाई आफ्नै कामको मोहले डोर्यायो । अहिले श्रीमान् अमेरिकामा छन् । उनी यहाँ संयुक्त परिवारमा बसेर आफ्नो कामलाई निरन्तरता दिइरहेकी छन् । मोडलिङलाई राम्रो व्यवसाय नमान्ने नेपाली समाजमा विवाहित महिलाले त्यो पनि संयुक्त परिवारमा बसेर करियर अघि बढाउने रन्जिता एक उदाहरण हुन् ।

पहिले श्रीमान्ले कहिलेकाहीँ आपत्ति जनाए पनि अहिले साथ दिइरहेका छन् । श्रीमान्भन्दा बढी साथ दिए उनका सासूससुराले । कहिलेकाहीँ श्रीमान्ले आपत्ति जनाउँदा पनि सासूससुराले छोरालाई सम्झाउँथे । कामलाई निरन्तरता दिन रञ्जिताको परिवारले नै उनलाई हौस्याइरह्यो । त्यहि हौसलाका कारण उनले हजारभन्दा बढी म्युजिक भिडियोमा मोडलिङ गरिसकेकी छन् ।

गोर्खा पल्टन, दसगजा, वडा नम्बर ६ लगायतका चलचित्रमा अभिनय गरेकी उनी चारवर्षे छोरीकी आमा हुन् । रञ्जिताले आफूलाई सधैं फिट राखेकी छन् । आफू सुहाउँदो भूमिका आउँदासम्म अभिनय गरिरहने उनको सोच छ । म्युजिक भिडियोबाटै आफूलाई स्थापित गरेकी रञ्जितालाई चलचित्रमा गरिने ‘टिम वर्क’ मन पर्छ । तर छोटो समयमा काम गर्न सकिने र राम्रो आम्दानी हुने भएकाले म्युजिक भिडियोमै रमाइलो लाग्छ ।

आफूले गरेको काममा आधुनिकतर्फ ‘मलाई बाँसुरीले रुवायो’ बोलको गीतको म्युजिक भिडियो र लोकदोहोरीतर्फ ‘सारी बम्बैको’ बोलको गीतको म्युजिक भिडियोबाट बढी सन्तुष्टि मिलेको छ । रञ्जिता ‘टिपिकल’ नेपाली गीतका म्युजिक भिडियोमा काम गर्न रुचाउँछिन् ।

अहिले लोकदोहोरीतिर पनि ‘प्याटर्न’ फेरिएको छ । एक हजार बढी म्युजिक भिडियोमा मोड्लिङ गरे पनि रञ्जिताको ‘टिपिकल’ नेपाली गीतमा काम गर्ने धोको अझै पूरा भएको छैन । गीत सुनेर छानीछानी मोडलिङ गर्ने उनको आफ्नै ‘रेट’ छ ।

त्योभन्दा कम रकममा काम गर्दिनन् । परिवारको साथमा रहेर करियरलाई निरन्तरता दिन चाहने रञ्जिताले आफूलाई व्यावसायिक कलाकारको रूपमा स्थापित गर्न सफल भएकी छन् ।

annapurnapost