काठमाडौं: भूकम्पबाट क्षतिग्रस्त संरचनाहरुको पुनर्निर्माणका लागि अर्थ मन्त्रालयले राष्ट्रिय पुनर्निर्माण प्राधिकरणलाई सोमबार थप २८ अर्व रुपैया निकासा दिएको छ । उपप्रधान तथा अर्थमन्त्री कृष्णबहादुर महराको तहबाट अर्थमन्त्रालयले पुनर्निर्माण कोषको रकम परिचालन गर्ने गरी निजी आवास अनुदान वितरण गर्न थप २८ अर्ब रुपैया निकासा गरिएको हो ।
प्राधिकरणका प्रवक्ता रामप्रसाद थपलियाका अनुसार भूकम्प प्रभावित जिल्लाहरुमा विद्यालय भवन पुनर्निर्माणका लागि चार अर्वको सिमामा रही विद्यालय पुनर्निर्माण कार्य अघि बढाउन स्रोतको सुनिश्चितता प्रदान गरिएको छ । कार्य प्रगतिका आधारमा थप रकम निकासा गर्दै जाने अर्थ मन्त्रालयले जनाएको छ ।
थपलियाका अनुसार सरकारी भवनहरु निर्माण गर्न थप ७५ करोड र जग्गा मुआब्जा वितरण गर्न २५ करोड गरी नेपाल सरकार स्रोत तर्फको थप एक अर्व रुपैयाको पुनर्निर्माण कार्यक्रमहरु सञ्चालन गर्न गराउन सहमति दिएको छ । यसबाट सरकारी विद्यालयहरु, सरकारी भवन तथा ग्रामीण सडकको पुनर्निर्माणमा स्रोत साधनको परिचालन गराउन सहज भएको प्रवक्ता थपलियाले बताए ।
annapurnapost
