मंसिर २०, २०७३- काठमाडौं–निजगढ (बारा) फास्ट ट्रयाक तथा दोस्रो अन्तर्राष्ट्रिय विमानस्थल माग गर्दै प्रदेश नं. २ को एक टोली काठमाडौं आएका छन् ।

६१ जनाको टोली पैदलै काठमाडौं आएका हो । तीन दशकदेखि चर्चामा रहे पनि निर्माण सुरु नभएको भन्दै उनीहरु काठमाडौं आएका हुन् ।
काठमाडौंमा विभिन्न दबाबमुलक कार्यक्रम गर्ने तयारी गरेको टोलीले सोमबार पेरिसडाँडामा प्रधानमन्त्री पुष्पकमल दाहाललाई भेट गरेको छ । फास्ट ट्रयाक तथा दोस्रो अन्तर्राष्ट्रिय विमानस्थल बनाउन ‘रु १’ लगानी भन्ने नारासहित उनीहरुले प्रधानमन्त्रीलाई ५५ हजार रुपैयाँ बुझाएका हुन् । उनीहरुले आफूहरुले संकलन गरेको पैसा व्यंग्य नभएर जनताले पनि सहयोग गर्न सक्छन् भन्ने उदाहरण पेस गरेको बताए।

फास्ट ट्रयाक–एयरपोर्ट निर्माण संघर्ष समिति, २ नम्बर प्रदेशले एक लाखको हस्ताक्षर पनि प्रधानमन्त्रीलाई बुझाएको छ ।

६ महिनाका लागि दबाबमुलक संघर्षका कार्यक्रम घोषणा गरेको समितिले माघ २२ देखि भने फास्ट ट्रयाक प्रवेशद्वारमा रिले अनसन सुरु गर्नेछ ।
प्रधानमन्त्रीले राजनीतिका लागि आन्दोलन भए पनि विकासका लागि सामूहिक दबाबमुलक कार्यक्रम गरेकोमा समितिलाई धन्यवाद दिए । उनले फास्ट ट्रयाक नेपालीले नै बनाउने दोहोर्‍याए ।
प्रधानमन्त्रीले संघर्ष समितिको दबाबले आफूले दबाब र ऊर्जा प्राप्त गरेको टिप्पणी गरे । उनले फास्ट ट्रयाक र निजगढ एयरपोर्ट नेपालको विकासका लागि रणनीतिक महत्त्वको रहेको बताए ।