काठमाडौँ, मङ्सिर २० गते । बेलायतको दुरहाम विश्वविद्यालयका पुरातत्वविद्को टोलीले पशुपति पश्चिम ढोकामा रहेको गुरुज्यूको सत्तलमा उत्खनन तथा माटो परीक्षण सुरु गरेको छ। विश्वविद्यालयका प्रा. रोविन कोलिङ्हम तथा पुरातत्व विभागका पूर्वमहानिर्देशक कोषप्रसाद आचार्यको निर्देशन तथा अनुगमनमा सत्तलको उत्खनन सुरु गरिएको हो।

उत्खननमा आइतबार गीर्वाणयुद्धविक्रम शाहको एउटा चाँदीको मोहर पाइएको छ। सत्तलबाट केही कदम पश्चिम सडकतर्फ ढल निकास बनाउने क्रममा जमिनमुनि लिच्छवीकालीन सातौँ शताव्दीको जलद्राणी सहितको शिवलिङ्ग पनि पाइएको छ।
पशुपति क्षेत्र विकास कोषका सदस्य सचिव डा. गोविन्द टण्डनका अनुसार गुरुज्यूको सत्तल यट्खा निवासी पाण्डे गुरुज्यू खलकले पछिल्लो समयमा बनाएको भए पनि यो सत्तल उत्खनन गर्दा महत्वपूर्ण पुरातात्विक सामग्री पाइने सम्भावना देखा परेको छ। कोषले यस क्षेत्रको उत्खनन कार्यलाई गम्भीरतापूर्वक लिएको पनि छ।

यसैबीच सत्तल सामुन्नेको राजा रणबहादुर शाहले निर्माण गराएको पशुपति महास्नानघरमा पशुपति सङ्ग्रहालय बनाउने कार्य अन्तिम चरणमा पुगेको छ । पुरातत्व विभागमा सङ्ग्रहालय निर्माण स्वीकृतिका लागि कोषले आवेदन गरिसकेको छ । नेपाल इन्भेष्टमेन्ट बैङ्कको तीन करोड रुपियाँको सहयोगमा यहाँ सङ्ग्रहालय बन्दैछ।

gorkhapatraonline