काठमाडौं, मङ्सिर २० गते । झण्डै छ वर्षपछि त्रिभुवन विश्वविद्यालय मातहतका क्याम्पसमा आगामी फागुन १४ गते स्वतन्त्र विद्यार्थी युनियन निर्वाचन हुनेभएको छ ।

निर्वाचनका लागि विश्वविद्यालयले औपचारिक रुपमा नै मिति निर्धारण गरिसकेको र विद्यार्थी संगठनबीच निर्वाचनका लागि लिएर लामो समयदेखि जारी विवाद समेत किनारा लागेपछि निर्वाचन हुने भएको हो । त्रिभुवन विश्वविद्यालय विद्यार्थी शाखाका प्रमुख गंगाबहादुर थापाले त्रिवि सभा बैठकले निर्वाचन मिति तोकिसकेको र प्रमुख विद्यार्थी संगठन निर्वाचनमा होमिन तयार भएपछि यसपटक निर्वाचन हुनेमा कुनै शंका नरहेको बताउनुभयो ।

लामो समयदेखि विद्यार्थी संगठनहरुबीच निर्वाचन प्रणालीको विषयलाई लिएर जारी विवाद किनारा लागेको छ । त्यसअनुसार अध्यक्ष, सचिव र कोषाध्यक्ष र आधा सदस्यको निर्वाचन बहुमतीय माध्यमबाट हुनेछ भने उपाध्यक्ष, सहसचिव र बाँकी सदस्यको निर्वाचन समानुपातिक निर्वाचन प्रणालीको माध्यमबाट हुनेछ ।

यसै साताभित्र विद्यार्थी संगठनसँग सामूहिक छलफल गरी निर्णयमा पुगिने जानकारी विद्यार्थी शाखाका प्रमुख थापाले बताउनुभयो । निर्वाचनमा उम्मेदवारको उमेर हद लाग्ने कि नलाग्ने भन्ने विषयमा सहमति हुन बाँकी छ । मतदान गर्न उमेरले कुनै फरक नपार्ने भए पनि उम्मेदवार हुन २८ वर्षको उमेर हद लगाउने या के गर्ने भन्नेमा निर्णय हुन बाँकी छ। पुस महिनामा बस्ने विश्वविद्यालय सभाको बैठकबाट यस विषयलाई टुङ्गो लगाउने जानकारी विश्वविद्यालयका पदाधिकारीहरुले दिएका छन् ।

निर्वाचन हुनुभन्दा एक महिनाअघि निर्वाचनको सबै कार्यतालिका सार्वजनिक गर्ने तयारी त्रिविले गरेको छ । विश्वविद्यालयका सबै आंगिक र सम्वन्धन प्राप्त सामुदायिक क्याम्पसमा स्ववियु निर्वाचन हुने प्रावधान छ ।

त्रिवि मातहतका झण्डै पाँच सयभन्दा बढी क्याम्पसमा २०६७ सालमा स्ववियु निर्वाचन हुनुपर्ने भए पनि छ वर्ष यता निर्वाचन हुन सकेको छैन । विश्वविद्यालयमा २०३६ सालदेखि स्ववियु निर्वाचन हुन थालेको हो ।

gorkhapatraonline