अमृता अनमोल

मंसिर १७, २०७३- प्रदेश नम्बर ५ बाट संसदमा प्रतिनिधित्व गरेका दलका नेताहरुले ५ नम्बर प्रदेश टुक्राउने गरी भएको संशोधन प्रताव अविलम्ब फिर्ता नहुँदासम्म आस्था पार्टी र समूहबाट माथि उठेर आन्दोलन जारी राख्ने बताएका छन्।

बुटवलमा शुक्रबार आयोजित प्रदेश नम्बर ५ स्तरीय अगुवा भेलामा बोल्दै एमाले उपाध्यक्ष बामदेव गौतम, विष्णु पौडेल, माओवादी केन्द्रका टोपबहादुर रायमाझी, कांग्रेसका चन्द्र भण्डारी लगायतका नेताहरुले प्रदेशका नागरिकको अहित र देश विखण्डनका लागि ल्याइएको प्रदेश टुक्राउने विधेयकलाई सडक, सदन र अदालतबाटै विफल पार्ने चेतावनी दिए । पहाड र तराईलाई जोडेर बनेको प्रदेश टुक्राउने विधेयक कुनै आस्था, पार्टी र सम्प्रदायको माग नभएकाले  नागरिकको मन टुक्राउने विधेयकविरुद्ध डटेर लड्ने र सरकारलाई चुनौती दिने बताए ।

माओवादी केन्द्रका नेता टोपबहादुर रायमाझीले ७ प्रदेशमा संघीयताको विभाजन गर्दा क्षेत्र नम्बर ५ सामथ्र्य र पहिचान दुवैका हिसाबले उपयुक्त भएकाले सरकारको जबर्जस्त लादिएको प्रदेश फुटाउने निर्णय आफूले नमान्ने बताए । संविधान ९० प्रतिशतको सहमतिमा बनेको १० प्रतिशतको अडानले संसोधन हुन लागेको भन्दै उनले अल्पमतको प्रस्तावलाई कुनै अर्थमा सफल हुन नदिने जिकिर गरे ।  कांग्रेस नेता चन्द्र भण्डारीले सरकार र आफ्नै दलका डाक्टरहरुले ५ नम्बर प्रदेशलाई आइसीयुमा पुर्‍याएकाले यसलाई टुक्रन नदिइ निको बनाउन  आफू आन्दोलनमा होमिएको बताए ।

नेताहरुले पूर्व र सुदुर पश्चिमका नेताले चाहे हिमाल,  पहाड र तराई मिलेर प्रदेश बन्न हुने तर यो प्रदेशका नेता र नागरिक कसैले नचाहे पनि प्रदेश टुक्राउन खोज्नु निरंकुशता र तानाशाह तन्त्र भएको पनि दाबी गरे । भेलामा सम्बोधनपछि दलहरुले १२ वटै जिल्लाबाट आएका नेता, कार्यकर्ता, सामाजिक संघसंस्था, नागरिक अगुवा र सर्वसाधारणको सहभागितामा बुटवलको राजमार्ग चौराहबाट विरोध जुलुस निकालेका छन् ।