मंसिर १०, २०७३- राष्ट्रिय आमसञ्चार नीति र सूचना तथा सञ्चारसम्बन्धी प्रतिवेदन बिहीबार सार्वजनिक गरिएको छ । उच्चस्तरीय समितिले तयार गरेको प्रतिवेदन सूचना तथा सञ्चारमन्त्री सुरेन्द्रकुमार कार्कीले सार्वजनिक गरेका हुन् । कार्यक्रममा मन्त्री कार्कीले प्रतिवेदनले औंल्याएअनुसार आवश्यक कानुनहरू निर्माण गर्दै त्यसलाई कार्यान्वयनमा लैजाने बताए ।

उनले प्रतिवेदन कार्यान्वयनका क्रममा त्यसका कमजोरी पनि उजागर हुँदै जाने र त्यहीअनुसार परिमार्जनसमेत गरिने उल्लेख गरे । सञ्चार मन्त्रालयका सचिव दिनेश थपलियाले प्रतिवेदनले दिएका सुझावहरू कार्यान्वयनका क्रममा रहेको जानकारी दिए । सूचना तथा सञ्चारसम्बन्धी उच्चस्तरीय समितिका अध्यक्ष काशीराज दाहालले प्रतिवेदनमा मिडियामा वैदेशिक लगानी व्यवस्थित गर्ने, मिडिया एकाधिकार अन्त्य गर्ने, आमसञ्चार प्राधिकरण गठन, सार्वजनिक सेवा प्रसारण बनाउनेलगायतका विषयहरू समेटिएको बताए ।

प्रेस काउन्सिललाई थप प्रभावकारी बनाउने, विज्ञापन काउन्सिलको परिकल्पना, अनलाइन मिडियालाई नियमन, चलचित्र र रेडियो फ्रिक्वेन्सीको व्यवस्थापनलगायतका विषयहरूमा आवश्यक सुझावसहितको प्रतिवेदन तयार पारिएको दाहालले जानकारी दिए ।