पोखराः उपचारका लागि बाहिर निकालिएका कास्की कारागारका कैदी पुष्कर खड्का अस्पतालबाट भागेका छन् । दिउँसो १ बजे उपचारका लागि उनलाई गण्डकी शिक्षण अस्पताल ल्याइएको थियो ।

दाँतको उपचारका लागि ल्याइएका उनी अस्पतालको शौचालयको झ्यालबाट भागेका हुन् । यसअघि पनि उनलाई उपचारका लागि अस्पताल ल्याउने गरिएको थियो । नियमित उपचारकै सिलसिलामा बिहीबार पनि अस्पताल ल्याइएको थियो ।

कास्की काराबार प्रमुख हरिप्रसाद गौतमका अनुसार खड्का २०७० वैशाख २६ देखि कारागारमा थिए । उनी अपहरण तथा शरीर बन्धक मुद्दामा कैद थिए । उनलाई अदालतले ६ वर्ष कैद र ४ लाख रुपैयाँ जरिवानाको फैसला गरेको छ । ३५ वर्षे खड्काको घर काभ्रे हो ।

कैदी खड्कालाई प्रहरी सहायक निरीक्षक बोजकुमारी क्षेत्री नेतृत्वको ३ जनाको टोलीले अस्पताल लगेको थियो । शौचालयको झ्याल खुला भएको मौका छोपेर कैदी खड्का भाग्न सफल भएका हुन् । तीनवटा खापा भएको झ्यालको एउटा खापाबाट सिसा निकालिएको हुँदा उनलाई भाग्न सजिलो परेको थियो । हत्कडी लगाएरै अस्पताल लगिएका उनलाई शौचालय जाने बेला भने हत्कडी खोलिएको थियो ।

annapurnapost