मंसिर ९, २०७३- नेशनल रेजिडेन्ट डक्टर्स एशोसिएसनले शुक्रबारदेखि त्रिवि शिक्षण अस्पताल (टिचिङ)को बहिरंग विभागमा सहभागी नहुने जनाएको छ ।

१२ दिनदेखि अनसनरत प्रा.डा. गोविन्द केसीको मागप्रति सरकारले कुनै चासो नदेखाएको भन्दै डक्टर्स एशोसिएसन आबद्ध चिकित्सकहरु भोलि (शुक्रबार) महाराजगन्जस्थित शिक्षण अस्पतालको बहिरंग विभागमा नजाने जनाएका हुन् ।

डक्टर्स एशोसिएसनका अध्यक्ष लिजन महर्जनले मेडिकल शिक्षा र समग्र स्वास्थ्य क्षेत्र सुधारको माग गर्दै १२ दिनदेखि अनसनमा रहेका प्रा.डा. गोविन्द केसीको जीवनरक्षाका लागि आफूहरु शिक्षण अस्पतालको बहिरंग विभाग नजाने निर्णयमा पुगेको कान्तिपुरलाई जानकारी दिए । उनले भने, ‘१२ दिनदेखि डा.केसी अनसनमा हुनुहुन्छ, तर सम्बन्धित निकायबाट कुनै कदम चालिएको छैन । त्यसैले हामी यसप्रति खेद प्रकट गर्दै बहिरंग विभाग नजाने निर्णयमा पुग्यौं ।’

वरिष्ठ चिकित्सक केसीको माग सम्बोधनको माग गर्दै डक्टरहरुले चरणबद्ध आन्दोलन गर्दै आएका छन् । यसअघि रेडिडेन्ट डक्टरहरु हातमा कालोपट्टी बााधेर काम गर्दै आएका थिए ।

उनीहरुले अविलम्ब वार्ता समिति बनाएर केसीका जनपक्षीय माग पूरा नगरे अझै चर्को आन्दोलन गर्ने चेतावनी दिएका छन् ।