रत्ननगर(चितवन)– तरकारीवालीको रुपमा सामािजक सञ्जालमा भाइरल भर्इ हाल विश्वभर चिनिएकी गोरखाकी कुसुम श्रेष्ठलाई स्नातकोत्तर तहसम्म अध्ययन गर्न छात्रवृत्ति प्रदान गरिएको छ।
कुसम अध्ययनरत चितवनको रत्ननगरस्थित क्वेस्ट मोडल कलेजमा बुधबार एक कार्यक्रम आयोजना गरी नेपाली चलचित्र निर्माता कम्पनी पपुलर मल्टी मिडियाले कक्षा ११ र १२ को लागि क्वेस्ट कलेजसँगको सहकार्यमा छात्रवृत्ति प्रदान गरेकाे हाे। त्यस्तै, काठमडौंको बबरमहलस्थित नेपाल मेघा कलेजको सहकार्यमा स्नातक र स्नातकोत्तर तहमा अध्ययनका लागि पूर्ण छात्रवृत्ति प्रदान गरिएको छ।
शिक्षण शूल्क तथा छात्रवृत्ति प्रदान कार्यक्रममा पपुलर मल्टी मिडियाका अध्यक्ष शक्ति बल्दव घोरासैनी, पपुलर मल्टी मिडियाले बनाउँदै गरेको चलचित्र ‘लम्फू’का निर्देशक गोपाल चन्द्र लामिछाने, चलचित्र निर्माता पुनम क्षेत्री गौतम, कलाकार सञ्जीत भण्डारी, बरिष्ठ साहित्यकार एलबी क्षेत्री, कुसुम श्रेष्ठका काका गोपिलाल श्रेष्ठ, क्वेस्ट मोडल कलेजका प्रिन्सिपल जगदिस चन्द्र शर्मालगायतको उपस्थिती थियो।
छात्रवृत्ती पाएपछि कुसुम श्रेष्ठले आफ्नो लागि यो सहयोग अतुलनीय रहेको बताएकी छन्।
‘यो सहयोग मेरो लागि अतुलनीय छ । उहाँहरुको चाहना जस्तै मैले उच्च शिक्षा प्राप्त गर्न निरन्तर मेहनत गर्नेछु,’ उनले भनिन्, ‘अहिले मेरो प्रमुख प्राथमिकता भनेको अध्ययन नै हो।’ उनले आफू निम्न आर्थीक अवस्थामा रहेको समयमा यो सहयोग निकै ठूलो महत्वकाे रहेकाे बताइन् ।
‘उच्च शिक्षासँगै देशको नाम पनि राखेर मेरो देशको र मेरा बाबा-आमाको सपना साकार पार्नेछु’ कार्यक्रममा बोल्दै उनले भनिन् ।
आयोजक तथा पपुलर मल्टी मिडियाका अध्यक्ष शक्ति बल्दव घोरासैनीले उनको पढ्ने चाहनालाई केही सहयोग गर्न पाउँदा खुसी लागेको बताए।
‘हामी अत्यन्तै खुसी छौँ । पेशा जुनसुकै अँगाले पनि उच्च शिक्षाले नै उनको भबिष्य निर्धारण गर्छ। यसकारण पनि हामीले उनलाई उच्च शिक्षाको छात्रवृत्ती प्रदान गरेका हौं,’ घोरासैनीले भने।
नेपाल चलचित्र निर्देशक समाजका महा-सचिव तथा चलचित्र निर्देशक गोपाल चन्द्र लामिछानेले कुसुमलाई आफूले ‘लम्फू’ चलचित्रमा उनलाई सुहाउने गरी एक भूमिका रहेकोले अफर गरेको बताए।
‘कुसुमलाई सुहाउने भूमिकामा हामीले अफर गरेका थियौं, तर उहाँले पहिले पढ्ने मनसाय व्यक्त गर्नुभयो,’ उनले भने, ‘पहिले शिक्षा र पछि जुनसुकै क्षेत्र रोज्न सक्ने भनेपछि हामीले उनलाई छात्रवृत्ति दिने बारेका निर्णय गरेका हौं, निर्देशक लामिछानेले भने, ‘उनको उच्च शिक्षाको लागि यो हाम्रो सानो सहयोग हो।’
चलचित्र निर्माता पुनम क्षेत्री गौतमले अवसर आयो भन्दैमा हाम फाल्न पनि नहुने र अवसरलाई नबुझी लत्याउन पनि नहुने बताइन् । गौतमले कुशुमले चाहेको खण्डमा मोडलिङ् क्षेत्रमा आफूले सहयोग गर्ने प्रतिवद्दता जनाइन्।
केही समयअघि कुसुमले तरकारी बोकेर हिँडिरहेको अवस्थामा खिचिएका दुई तस्वीर संसारभर भाईरल बनेका थिए। उनका फोटोमा ‘तरकारीवाली’ ट्याग लगाउँदै विश्वभरका करोडौँ मानिसले सामाजिक सञ्जालहरुमा शेयर गरेका थिए।
nagariknews
