मंसिर ८, २०७३- फुच्चे जहाज (अल्ट्रालाइट) दुर्घटनामा चालक रसियन नागरिक अलेक्जेन्डर म्याक्सीमभको (Alexandar Maximov) मृत्यु भएको छ ।

एभिया क्लबको ९एनएएलएल कल साइन भएको अल्ट्रालाइट चापाकोट–६ स्थित रनवेबाट उड्ने क्रममा जमिन छाड्नसाथ खसेको थियो । ‘जमिन छाड्नसाथ अनियन्त्रित भएर खसेको पाइयो’, प्रत्यक्षदर्शीलाई उद्धृत गर्दै घटनास्थल पुगेका वडा प्रहरी कार्यालय बैदामका निरीक्षक मोहनमणि अधिकारीले भने, ‘प्राविधिक टोलीले अनुसन्धान गरेपछि दुर्घटनाको कारण थाहा होला ।’ अल्ट्रालाइटको अगाडिको भाग जमिनमा धसिएको थियो ।

चालक अलेक्जेन्डर १४ वर्षदेखि एभिया क्लबमा आबद्ध थिए । उनी एभिएका वरिष्ठ पाइलट तथा प्रशिक्षकसमेत रहेका क्लबले जनाएको छ ।

५एन०५६९५८१९ पासपोर्ट नम्बर भएका ६२ वर्षीय उनको उपचारका क्रममा गण्डकी मेडिकल कलेजको अस्पतालमा मृत्यु भएको प्रहरीले जनाएको छ । दुर्घटनामा क्यानेडियन नागरिक २७ वर्षीया जीलेन मेरी भोल्कर (Jillene Marie Volker) घाइते भएकी छिन् । पेटमा चोट लागेकी उनको सोही अस्पतालको आइसियु कक्षमा उपचार भइरहेको छ । उनी खतरामुक्त रहेको चिकित्सकले जनाएका छन् ।