जर्मन चान्सलर एंगेला मर्केलले आफ्नो पार्टी सिडियुका वरिष्ठ सदस्यहरुलाई फेरि पनि चुनावमा उम्मेदवारी दिने बताएकी छिन्।
६२ वर्षीया मर्केलले पार्टी मुख्यालयमा आइतबार त्यसबारेमा औपचारिक घोषणा गर्ने अपेक्षा गरिएको छ।
जर्मनीमा आगामी वर्षको शरद ऋतुमा आमचुनाव हुने अनुमान गरिएको छ।
मर्केल सबैभन्दा लोकप्रिय रहेको समयमा भन्दा अहिले उनीप्रतिको समर्थन घटेको छ तर अझै पनि लोकप्रिय छिन्।
हार स्वीकार
यसै वर्ष केही समयअघि एउटा क्षेत्रीय चुनावमा उनले लज्जास्पद हार व्यहोरेकी थिइन् र जर्मनीका सबै स्थापित पार्टीका मतहरु लगिरहेको लोकप्रियतावादी दक्षिणपन्थी एएफडी पार्टीले उनलाई चुनौती दिएको छ ।
चुनावपछि मर्केलले थुप्रै राज्यमा व्यवहोरेको हारको जिम्मेवारी स्वीकारेकी थिइन्।
आप्रवासीहरुका लागि ढोका खुला राख्ने आफ्नो नीति थुप्रै राज्यमा हारको कारण बनेको पनि उनले स्वीकार गरिन्।
थुप्रै हप्तादेखि चान्सलरको प्रश्न भनिएको प्रश्नले जर्मनीका समाचारपत्रहरुमा छाइरहेको थियो र मर्केल चौथो कार्यकालका लागि चुनाव लड्ने खबरले थुप्रैलाई राहत दिने बर्लिनबाट बीबीसीकी जेनी हिल बताउँछिन्।
चुनौती
शरणार्थीसम्बन्धी नीति विवादास्पद भएतापनि मर्केललाई अझै पनि धेरैले समर्थन गरेको र थुप्रैले उनलाई चान्सलरको पदको लागि एकमात्र सक्षम उम्मेदवार ठानेको बीबीसी संवाददाता जेनी हिल बताउँछिन्।
युरोपका थुप्रै देशमा दक्षिणपन्थी पार्टीहरुको लागि बढ्दो समर्थन र अमेरिकामा डोनल्ड ट्रम्पको विजयपछि केही विश्लेषकहरुले मर्केललाई पश्चिमा मुलुकमा उदार मूल्य र मान्यताको एक मुख्य आधार मानेका छन्।
कम्युनिस्ट पूर्वी जर्मनीमा हुर्केकी धर्मगुरुकी छोरी मर्केलले सन् २००५ देखि एकीकृत जर्मनीको नेतृत्व गरेकी छिन्।
युरोपको ठूलो आर्थिक शक्ति जर्मनीमा राष्ट्रप्रमुखको कार्यकालमा कुनै समयसीमा छैन।
BBC
