काठमाडौं : साताको पहिलो दिन खुलेको सेयर बजारमा भयानक पहिरो गएको छ । बजार खुलेदेखि नै रातो भएको नेप्से पौनै एक बजेसम्म ६६ अंकले आरोलो लागेको छ।

गत बिहीबार पनि बजार चालिस अंकले तल ओर्लिएको थियो ।बजार खुलेको डेढघन्टामै  ४ प्रतिशतभन्दा बढी अर्थात ६६ अंकले बजार तल ओर्लिएपछि सर्किट ब्रेक लागेर कारोबार आधाघन्टाका लागि स्थगित भएको छ।

गत बिहीबारको पहिरोले अत्तालिएका लगानीकर्ताहरु आइतबारको गिरावट देखेर तर्सिएका छन् । बिहीबार ठूलो अंकमा गिरावट आएपछि आइतबार बजार केही सुध्रिन्छ भन्ने झिनो आसमा रहेका लगानीकर्ताहरु निकै निरास भएका छन् ।४ प्रतिशतभन्दा बढी दर बजार ओर्लिन थालेपछि कारोबार स्थगित भएको छ।

घट्ने बढ्ने सेयर बजारको सामान्य नियम नै हो । तर एकैदिन सेयरमा यति धेरै अंक घट्नुपर्ने अहिले कुनै पनि राजनीतिक तथा वित्तिय कारण नभएको विज्ञहरुले बताइरहेका छन् । अधिकांश कम्पनीहरुले गत वर्षभन्दा बढी नाफा कमाइरहेको पहिलो त्रैमासिक रिपोर्ट दिइरहेको र गत वर्षको कमाइबाट कम्पनीहरुले बोनस र हकप्रदको आकर्षक प्याकेज घोषणा गरिरहेका बेला बजारमा देखिएको यो गिरावटलाई विज्ञहरुले समेत अस्वभाविक र आश्चार्यजनक रहेको प्रतिक्रिया दिएका छन् ।

केही ठूला खेलाडीहरुको चलखेलका कारण बजारमा नाटकीय उथलपुथल देखिएको अनुमान गरिएको छ ।भूकम्प र नाकाबन्दीजस्ता विषय परिस्थितिलाई समेत सामाना गर्दै निरन्तर माथि उक्लेको सेयर बजारमा पछिल्लो समयमा नाटकीय उतारचढाप देखिएको छ । यसले बजारको आकर्षण र विश्वसनियतामाथि समेत प्रश्न उठ्न थालेको छ ।

आकर्षक लाभांस तथा बोनस आइरहेका बेला राम्रा कम्पनीहरुको सेयर घटाएर बुक गर्ने दाउमा एकथरी खेलाडीहरु देखिएका छन् । यतिबेला मध्यम र साना लगानीकर्ताहरु नाटकीय उतारचढापबाट सिकार भएका छन् ।

अहिलेसम्मको सर्वाधिक उच्च विन्दु १८८१ छोएर तल ओर्लिएको बजार लामो समय १७ सयको वरीपरी अडिए पनि बिहीबार र आइतबारको गिरावटले बजारलाई १६ सयको विन्दुबाट पनि तल झरेको छ।

annapurnapost