भरतपुरः चितवनको भरतपुर उपमहानगरपालिकाले सडक व्यवस्थित गर्न नगर यातायात गुरुयोजना बनाउने तयारी गरेको छ । सडक सञ्जाललाई व्यवस्थित गर्ने गरी गुरुयोजना बनाउन लागिएको भरतपुर उपमहानगरपालिकाले जनाएको छ ।
नगर क्षेत्रभित्र सडक तथा यातायातको पहुँचको अवस्था, निर्माण, मर्मत, सुधार, स्तरोन्ति र पुनर्निर्माण गर्नुपर्ने सडकको माग संकलन, सडक यातायातसँग सम्बन्धित आवश्यक सेवा तथा सुविधाको सान्दर्भिक योजना तयार र भविष्यमा सडकको व्यवस्थित विकास गर्न गुरुयोजना नै बनाएर अगाडि बढेको भरतपुर उपमहानगरपालिकाका कार्यकारी अधिकृत महेश बराल बताए ।
‘सरकारले भरतपुर उपमहानगरपालिकालाई यातायात गुरुयोजना बनाएर नगरलाई यातायात सञ्जालसँग जोड्न प्राथमिकतामा राखेको छ’, उनले भने, ‘सरकारले नै प्राथमिकतामा राखेको गुरुयोजना भएकोले यसैको आधारमा हामी अगाडि बढेका छौँ ।
अबको पाँच वर्षभित्र गुरुयोजना अनुसार सडक निमार्ण हुनेछन् ।’ नगरका मुख्य सडक साँघुरो हुँदा यात्रा जोखिमपूर्ण बनेको उनको भनाइ छ । जनसंख्या र बस्ती बढ्दै जाँदा भविष्यमा चुनौती थपिने भन्दै उनले यातायात गुरुयोजना बनाउन थालिएको बताए । ‘गुरुयोजना बनाउन चाँडै नगरस्तरीय छलफल थालिने छ’, उनले भने, ‘यसले व्यवस्थित सडक सञ्जाल बनाउन सहयोग पुग्छ ।’
भरतपुर उपमहानगरपालिकाभित्र आठ सय ९० किलोमिटर सडक छ त्यसमध्ये २४ मिटर चौडा सडक ७२ किलोमिटर, १६ मिटर चौडा सडक एक सय ४३ किलोमिटर, नौ मिटर चौडा सडक एक सय ९८ किलोमिटर, ६ मिटर चौडा सडक दुई सय ६९ किलोमिटर र ५३ किलोमिटर राजमार्ग छन् ।
गुरुयोजना अनुसार जाने हो भने सन् २०२२ सम्ममा उपमहानगरपालिकाभित्र २४ मिटर फराकिला ११ वटा सडक निर्माण हुने उनले बताए । भरतपुर उपमहानगरपालिकाले ६ मिटरभन्दा कम सडकमा नक्सापास दिँदैन । भरतपुरमा तीन मिटरभन्दा साना सडक निकै कम रहेको उनले बताए ।
गुरुयोजना अनुसार काम सम्पन्न गर्न एक अर्ब २२ करोड ४३ लाख ३२ हजार रुपैयाँ खर्चिने योजना बनाइएको छ । कार्यकारी अधिकृत बरालले वर्गीकृत सडकहरूलाई मापदण्डअनुसार बनाउन सडक बिस्तार गरिने बताए । उनले सडक अतिक्रमण भएका ठाउँमा संरचना भत्काइने बताए ।
उपमहानगरपालिकाले २४ मिटर चौडा सडकलाई क, १६ मिटर चौडा सडकलाई ख, नौ मिटर चौडा सडकलाई ग र ६ मिटर चौडा सडकलाई घ मा वर्गीकरण गरेर अगाडि बढेको छ । ‘क वर्गका सडकले नगर क्षेत्रको यातायात सेवा दिन्छन् । ती सडकहरू राजमार्ग वा सहायक राजमार्गबाट छुट्टिने सडक हुन्’, उनले भने, ‘बाईपासरोडदेखि टिकौली चेकपोस्ट्सम्मका सडक क वर्गमा पर्छन् ।’ गुरुयोजनाअन्तर्गत भरतपुर सहरको रिङरोडको अवधारणा ल्याइएको छ ।
पुल्चोक, बाईपास सडक, आँपटारी चोक, ब्रह्मटोल, छिम्केश्वरी, टिकौली चेकपोस्ट्, वनदेवी चोक, गणेश चोक, टाँडी चोक, पाण्डे चोक, पदमपोखरी चोक, लाहुरे चोक, शिवनगर चोक, मंगलपुर चोक, फुर्तीचोक, शिवघाट, रामघाट हुँदै पुलचोकसम्म रिङरोड बनाउने गुरुयोजना अघि सारिएको छ ।
यातायात व्यवस्था विभागका प्राविधिक सल्लाहकार पदमबहादुर शाहीले सडक सञ्जाल बिस्तार तथा सुधार गर्न नगर यातायात गुरुयोजना महत्वपूर्ण हुने दाबी गरे । ‘विकासका पूर्वाधारमध्ये सबैभन्दा महत्वपूर्ण पूर्वाधार भनेको सडक हो’, उनले भने, ‘सबै नगरमा यातायात गुरुयोजना सबैभन्दा पहिलो र महत्वपूर्ण विकासको काम हो ।’
भरतपुर उपमहानगरपालिकाका धेरै ठाउँ सडक सञ्जालले जोडिएको कारण केही सडकलाई बिस्तार गरी अगाडि बढ्ने हो भने उपमहानगरपालिकाको विकास गर्न सहज हुने उनले बताए । प्रस्तावित रिङरोड, रामपुर सडक र हुलाकी राजमार्गमा ठूला बस सञ्चालन गर्नुपर्ने उनको भनाइ छ ।
बजार क्षेत्र तथा सेवा केन्द्र जोड्ने, खेतीयोग्य जमिन तथा पर्यटकीय क्षेत्र जोड्ने, लाभान्वित जनसंख्याको आधारमा फोहोर व्यवस्थापन क्षेत्र जोड्ने, सम्भावित विकासका पूर्वाधार जोड्ने, दलित तथा पिछडिएको बस्ती र माथिल्लो तहको सडकलाई जोड्ने सडकका आधारमा गुरुयोजना निर्माण गरिएको उनले बताए ।
annapurnapost