कार्तिक २३, २०७३- अख्तियार दुरुपयोग अनुसन्धान आयोगका महाअभियोग लागेका प्रमुख आयुक्त लोकमानसिंह कार्कीविरुद्ध सर्वोच्च अदालतमा आज (मंगलबार) बाट सुनुवाई सुरु हुने भएको छ ।

म्याद तामेलीमा अवरोध गरेको आरोपमा विपक्षी बनाइएका कार्कीसहित अन्य चारजनाविरुद्धको मुद्दा सुनुवाईको लागि पेशीमा चढेको हो । न्यायधीश आनन्दमोहन भट्टराईको एकल इजलासमा मुद्दाको सुनुवाई हुने सर्वाेच्च अदालतले जनाएको छ ।

त्यसक्रममा कार्की लगायतमाथि कारबाहीको माग गरेका कानुन व्यवसायीले उनीहरुमाथि कारबाही गर्नुपर्ने कारण, त्यसको औचित्य र प्रमाण पेश गर्नेछन् ।

माओवादी केन्द्रका सांसद महेन्द्रबहादुर शाही प्रस्तावक भइ एमालेका सांसदहरुको समर्थनमा संसदमा अख्तियार प्रमुख कार्कीविरुद्ध महाअभियोग प्रस्ताव दर्ता गरिएको छ । महाअभियोग प्रस्तावमाथि छलफल प्रारम्भ भएको छ भने कात्तिक २५ गते बस्ने संसद बैठकमा छलफलले निरन्तरता पाउने संसद सचिवालयले जनाएको छ ।

कार्कीलाई महाअभियोगबाट हटाउन सत्तारुढ माओवादी केन्द्र र प्रमुख प्रतिपक्षी एमाले लगायत दल सहमत छन् भने सत्तारुढ कांग्रेसले अझै निर्णय गर्न सकेको छैन ।