मलेखु (धादिङ), कात्तिक २० गते । भारतबाट हरेक महिना गाउँभरिका मानिसहरु महँगो प्याड किनेर प्रयोग गरिरहेका अवस्थामा गाउँमै गुणस्तरयुक्त प्याड उद्योग स्थापना गरी उत्पादन सुरु गरिएको छ ।

साना किसान महिला सहकारी सेमजोङका अध्यक्ष मीना तामाङ समेतको समूह निर्माण गरी महिलालाई आम्दानी बढाउन गाउँमै उद्योग सञ्चालन गरिएको हो । रजस्वलाका बेला प्रयोग गरिने प्याड उत्पादनका लागि जर्मन विकास सहयोग (जिआइजेड)ले यन्त्र खरिद गरी महिलालाई तालिम दिएपछि विकट गाविसमा रहेको सेमजोङमा जिल्लामै पहिलो पटक यस्तो उद्योग सञ्चालन गरिएको हो ।
“महिनावारी हुँदा प्रयोगमा ल्याइने प्याड गाउँमा हरेक महिना लाखौँमा खरिद हुने गरेको थियो । अब गाउँमै बनाइएपछि गाउँबासीको खर्च गाउँमै आम्दानी हुनेछ”, तामाङको भनाइ छ । गाउँमै उत्पादन भएको एक प्याडको रु ६० पर्छ । बाहिरबाट खरिद गरिएको एक प्याडको रु एक सय २० भन्दा बढी पथ्र्याे । बाहिरबाट खरिद गरिएको प्याड गुणस्तरयुक्त नभएको र एक दिनलाई पनि नपुग्ने तर गाउँको प्याड राम्रो र गुणस्तरयुक्त युक्त भएकाले थोरै प्रयोग गरेर नै हुनेखालको रहेको उद्योगमा कार्यरत पुष्पा तामाङले बताउनुभयो ।
महिला मात्र संलग्न उद्योगले हरेक दिन तीन सय प्याड बनाउँछ । हालका दिनमा गाउँमै उत्पादन भएको प्याडको माग पूरा गर्न धौ धौ परेको र केही समयपछि निर्यात गर्ने तयारीमा रहेको सहकारीका अध्यक्ष तामाङले जानकारी दिनुभयो । दुई सातअघिदेखि उत्पादन सुरु भएको सो उद्योग जिल्लाकै नमुनाका रुपमा रहेको साना किसान कृषि सहकारी जिल्ला सङ्घका डिबी सिङ्खडाले बताउनुभयो ।

रासस