नेपालले नयाँ संविधान जारी गरेको एक वर्षभन्दा बढी समयपछि भारतले पहिलोपटक उच्च तहबाट स्पष्ट शब्दमा बधाई दिएको परराष्ट्र मन्त्रालयका अधिकारीहरुले बताएका छन्।
तीनदिने राजकीय भ्रमणका लागि काठमाण्डू आइपुगेका भारतीय राष्ट्रपति प्रणव मुखर्जीले आफ्नी नेपाली समकक्षी विद्यादेवी भण्डारीसँगको भेटवार्तामा नेपालले संविधान जारी गरेकोमा स्वागत गरेको परराष्ट्र मन्त्रालयका प्रवक्ताले बताए।
अधिकारीहरुका अनुसार मुखर्जीले बुधबार नै प्रधानमन्त्री प्रचण्ड तथा उपराष्ट्रपति नन्दबहादुर पुनसँग द्विपक्षीय सम्बन्ध र आपसी हित लगायतका विषयमा छलफल गरेका छन्।
गत असोज ३ गते नेपालको संविधानसभाले नयाँ संविधान जारी गरेकोमा विभिन्न मुलुकले बधाई दिइरहँदा रुष्ट देखिएको भारतले आफूलाई जानकारीमा आएको मात्रै बताएको थियो।
पहिलोपटक
त्यसपछि विभिन्न सन्दर्भमा नेपालको संविधानको विषयमा प्रसंग उठ्दा पनि उसले स्पष्ट शब्दमा बधाई दिएको थिएन।
तर आफ्नी नेपाली समकक्षी भण्डारीको निम्तोमा राजकीय भ्रमणका लागि काठमाण्डू ओर्लिएका भारतीय राष्ट्रपति मुखर्जीले नेपालमा संविधान जारी भएकोमा बधाई दिन छुटाएनन्।
परराष्ट्र मन्त्रालयका प्रवक्ता भरतराज पौड्यालले भने, “भारतका महामहिम राष्ट्रपतिज्यूले गत वर्ष नेपालमा संविधान जारी भएकोमा नेपालका सम्मानीय राष्ट्रपतिज्यू, संविधानसभा र नेपाली जनताप्रति हार्दिक बधाई ज्ञापन गर्नुभयो।”
वर्षैको प्रयासपछि नेपालमा नयाँ संविधान जारी भएकोमा नेपाली भूमिमै आएर भारतीय राष्ट्राध्यक्षको तहबाट बधाई दिइएको यो नै पहिलोपटक भएको बताइएको छ।
गत १८ वर्षमा भारतीय राष्ट्रपतिबाट नेपालको भ्रमण भएको पनि यो पहिलोपटक नै हो।
सहजकर्ता
भारतीय वायु सेनाको विशेष विमानबाट अपरान्ह अवतरण गरेका मुखर्जीलाई राष्ट्रपति भण्डारीले नै त्रिभुवन अन्तर्राष्ट्रिय विमानस्थलमा स्वागत गरेकी थिइन्।
उनीसहित उपराष्ट्रपति, प्रधानमन्त्री र परराष्ट्रमन्त्री लगायत सेनाका उच्चपदस्थ अधिकारीहरु मुखर्जीलाई स्वागत गर्न विमानस्थल पुगेका थिए, जहाँ नेपाली सेनाले २१ तोपको सलामीसहित उनीप्रति राजकीय सम्मान व्यक्त गरेको थियो।
तत्कालीन माओवादी विद्रोहीलाई मूल राजनीतिक धारमा ल्याउने १२ बुँदे सहमतिका सहजकर्ताका रुपमा पनि चिनिने भारतीय राष्ट्रपति मुखर्जीले नेपालमा राज्यस्तरबाट भव्य स्वागत पाइरहँदा सामाजिक सञ्जालमा भने तीव्र आलोचना खेपिरहेका छन्।
विनाशकारी भूकम्प लगत्तै गत वर्षको अघोषित नाकाबन्दीका बेला आमनागरिकले भोग्नु परेका अभाव र पीडालाई स्मरण गर्दै कतिपयले मुखर्जीलाई स्वागत छैन भन्दै गरेको ट्वीट गरेका छन् भने कतिपयले ‘अमानवीय’ नाकाबन्दी भन्दै त्यसका लागि भारतको तर्फबाट मुखर्जीले माफी माग्नुपर्ने विचार व्यक्त गरेका छन्।
BBC