अमेरिकी राष्ट्रपतीय चुनाव आउन एक हप्ता भन्दा पनि कम समय बाँकी रहँदा त्यहाँको चुनावी गतिविधिमा नेपाली अमेरिकीहरुको पनि सक्रियता बढेको छ।

डेमोक्र्याट र रिपब्लिकन दुवै दलका चुनावी गतिविधिमा नेपालीहरुको सहभागिता छ।

गत शनिबार अमेरिकाको पूर्वी तटीय शहर फिलाडेल्फियामा राष्ट्रपति पदका लागि डेमोक्र्याट दलकी उम्मेदवार हिलरी क्लिन्टनको पक्षमा चुनावी मत जुटाउन एसियन प्यासिफिक अमेरिकीहरुले आयोजना गरेको भेलामा झण्डै डेढ सय नेपालीहरु सहभागी भए।

उल्लेख्य

Image copyrightREUTERS

भर्जिनिया, डिसी, र मेरिल्याण्डबाट उक्त भेलामा सहभागी हुन पुगेका नेपालीहरुको संख्या त्यो भेलाका अन्य सहभागीहरुको तुलनामा उल्लेख्य हो।

क्लिन्टनको पक्षमा चुनावी मत जुटाउन नेपाली मूलका अमेरिकीहरु परम्परागत बाजागाजासहित झण्डै अढाई सय वर्ष अघि अमेरिकी स्वतन्त्रताको घोषणा गरिएको शहर फिलाडेल्फिया पुगेका थिए।

यो चुनावी अभियान अमेरिकाको १६ राज्यका नेपाली समुदाय सक्रिय रहेको ‘नेपाली फर हिलरी’ अभियानका संयोजन गरिरहेका मेरिल्याण्डको स्थानीय राजनीतिमा डेमोक्र्याट दलबाट सक्रिय एच बी भण्डारीले बताए।

डेमोक्र्याट समर्थकहरु जस्तै रिपब्लिकन पार्टीबाट राष्ट्रपतिका उम्मेदवार डोनल्ड ट्रम्पको पक्षमा पनि नेपालीहरु सक्रिय छन तर संख्या र गतिविधिका हिसाबले अलि कम।

ट्रम्प समर्थक मतदाता चन्द्रप्रकाश शर्मा बेल्बासेले भने, “नेपालीहरु ट्रम्पको पक्षमा कम देखिन्छन्, तर अमेरिकी नागरिकहरुका लागि उनका योजनाहरु ठीक छन्।”

सक्रिय

नेपालको अर्घाखाँचीबाट भारतको मेघालय हुँदै सपरिवार अमेरिका पुगेका बेल्बासे रिपब्लिकन उम्मेदवार ट्रम्पलाई जिताउन चुनावी अभियानमा सक्रिय छन्, तर उनको सक्रियता चाहिँ अमेरिकी मतदाताको भोट माग्ने भन्दा पनि ट्रम्पको भलो होस् भन्दै अखण्ड दीप प्रज्वलनमा छ, त्यो पनि नेपालकै अर्घाखाँचीमा।

जुन दलबाट चुनावी अभियानमा संलग्न भए पनि अन्तत: यस्तो अभियानले अमेरिकामा रहेका नेपाली समुदायको उपस्थिति र मूल्य उँचो पार्ने भण्डारी बताउँछन्।

२१ करोडभन्दा धेरै अर्थात नेपालको जनसंख्याभन्दा सात गुणा बढी मतदाताको बीचमा केही हजारको संख्यामा रहेका नेपाली अमेरिकी मतदाता संख्या र उपस्थिति दुवै हिसाबले न्यून हो, जसले अमेरिकी मूलधारको राजनीतिमा फेरबदल ल्याउने औकात राख्दैन।

तर अमेरिकामा नेपाली समुदायको बढ्दो उपस्थितिलाई यसले प्रष्ट संकेत गर्छ।

हाल अमेरिकामा रहेका श्रेष्ठ बीबीसी साझा सवालका पूर्व प्रस्तोता हुन्।