बहुप्रतीक्षित त्यो प्रतिवेदनले जुमालाई ३० दिनभित्रमा एउटा अनुसन्धान गर्ने न्यायिक आयोग स्थापना गर्न सुझाव दिएको छ।
भ्रष्टाचारविरोधी निकायकी पूर्व प्रमुख टुली मडोनसेलाले तयार पारेको उक्त प्रतिवेदनलाई राष्ट्रपति जुमाले सार्वजनिक गर्न नदिने प्रयास गरेका थिए।
जुमाका वकिलले अब जुमाले उक्त प्रतिवेदनलाई अवरुद्ध नगर्ने बताएपछि त्यस्तो आदेश आएको हो।
झडप
जुमाले न्यायलाई ध्यानमा राखेर त्यो कानुनी प्रयास फिर्ता लिएको बताएका छन् र प्रतिवेदनको पाठ हेरेपछि मात्रै कानुनी रुपमा त्यसलाई चुनौती दिने कि नदिने निर्णय गरिने बताएका छन्।
जुमामाथि सम्पन्न व्यापारीहरुसँग अनुचित सम्बन्ध राखेको आरोप लगाइएको थियो।
एकजना न्यायाधीशले राष्ट्रपति जेकब जुमाविरुद्ध लागेका भ्रष्टाचारका आरोपसम्बन्धी प्रतिवेदन बुधबार नेपाली समयअनुसार बेलुकी पौने ९ बजे सम्ममा सार्वजनिक भइसक्नुपर्ने बताएपछि राष्ट्रपतिको कार्यालय अगाडि झडप भएका थिए।
उनको राजीनामा माग गरिरहेका प्रदर्शनकारीहरुमाथि प्रहरीले पानीको फोहोराले प्रहार गरेका थिए।
‘इकोनोमिक फ्रिडम फाईटर्स’ नामक पार्टीका समर्थक ती प्रदर्शनकारी जुमाको प्रशासनिक कार्यालय अगाडि जम्मा भएका थिए।
विरोध
दक्षिण अफ्रिकाका अन्य प्रमुख शहरहरुमा पनि विपक्षी समूहहरुले प्रदर्शन गरिरहेका छन्।
राष्ट्रपति जुमामाथि करिब १ दशकदेखि भ्रष्टाचारका आरोप लाग्दै आएका छन्त, र उनले बारम्बार आफूले केही गल्ती नगरेको बताउँदै आएका छन्।
जुमाले सम्पन्न गुप्ता परिवारलाई सरकारमा अनुचित रुपमा हस्तक्षेप गर्न दिएको आरोपमाथि भ्रष्टाचार विरोधी निकायकी भूतपुर्व प्रमुख टुली मडोनसेलाले अनुसन्धान गरेकी थिइन्।
गुप्ता परिवारमाथि व्यापारिक सुविधा लिएर त्यसको साटो मन्त्रीहरुलाई नियुक्त गर्ने प्रयास गरेको आरोप लगाइएको छ।
BBC