चुनाव आउनु केही दिन अघि मात्रै भएको अनुसन्धानको खुलासाले गहिरो समस्या पारेको भन्दै क्लिन्टनले पूर्ण तथ्य पाउने अधिकार मतदाताको रहेको बताइन्
अमेरिकाको राष्ट्रपतीय चुनावकी प्रत्यासी हिलरी क्लिन्टनले त्यहाँको अनुसन्धान निकाय एफबीआइले उनको इमेल प्रयोगका बारेमा अनुसन्धान पुन: भइरहेको विषय खुलासा गर्नुलाई यसअघि कहिल्यै नभएको र गहिरो रुपमा समस्या ल्याउने खालको भएको बताएकी छन्।
चुनावी प्रचारप्रसारका क्रममा बोल्दै क्लिन्टनले चुनाव हुन दुई साता भन्दा कम समय बाँकी रहेको बेला थोरै सूचनाको आधारमा उक्त अनुसन्धानको घोषणा गर्नु अनौठो भएको बताइन्।
एफबिआइका निर्देशक जेम्स कोमीले चुनाव हुनु ११ दिन अघि शुक्रबार क्लिन्टनको इमेल प्रयोगसम्बन्धी अनुसन्धान भइरहेको विषय संसदलाई जानकारी गराएका थिए।
आलोचना
कोमीले संसदलाई लेखेको पत्रमा, हिलरी क्लिन्टनले विदेशमन्त्री हुँदा गोप्य सूचनाको व्यवस्थापनमा हेलचक्रयाइं गरेको हुनसक्ने विषयमा भएको अनुसन्धानसँग सम्बन्धित ठानिएका नयाँ इमेलहरु प्राप्त भएको उल्लेख गरिएको थियो।
कोमीले आफ्नो उक्त कदमको बचाउ गर्दै भनेका छन्, यदि अनुसन्धानसम्बन्धी विषय सार्वजनिक नगरेको भए त्यो भ्रामक हुनसक्थ्यो र त्यसलाई गलत रुपमा बुझ्न सकिन्थ्यो।
शनिबार फ्लोरिडामा आफ्ना समर्थकहरुमाझ बोल्दै क्लिन्टनले एफबीआइको उक्त खुलासा अनौठो मात्रै नभइ यसअघि कहिल्यै नभएको बताइन्।
यसबारे पूर्ण तथ्य पाउने अधिकार मतदाताको रहेकोले यसले निकै समस्यामा पारिरहेको उनले बताइन्।
आरोप
उनले भनिन्, “हामीलाई थाहा छैन केलाई विश्वास गर्ने हो। र, म पक्का छु यस्ता अफवाहहरु अझ धेरै हुनेछन्। त्यसैले एफबीआइले जे भनिरहेको छ त्यसबारे हामीलाई स्पष्ट पार्न उ नैतिक रुपमा बाध्य छ।”
क्लिन्टनले इमेल प्रयोगबारे गत जुलाईमा भएको एफबीआइको अनुसन्धानले उनले कुनै गैरकानुनी काम नगरेको जसरी स्पष्ट पारेको थियो अहिले पनि त्यसमा परिवर्तन नहुनेप्रति आफू विश्वस्त रहेको बताइन्।
द न्यूयोर्क टाइम्सका अनुसार क्लिन्टनका समर्थकहरुले मतदानको दिन नजिक रहेको बेला यस्तो सूचना सार्वजनिक गर्ने त्यहाँको न्यायमन्त्रालयका अधिकारीहरुको निर्णयको व्यापक रुपमा आलोचना गरेका छन्।
क्लिन्टनका रिपब्लिकन प्रतिद्वन्द्वी डोनल्ड ट्रम्पले एफबीआइको अनुसन्धानबारे टिप्पणी जारी राख्दै क्लिन्टनले जाने बुझेरै आपराधिक काम गर्न खोजेको आरोप लगाएका छन्।
BBC
