प्रधानमन्त्री प्रचण्डले लोडशेडिङ सात घण्टामा सीमित पार्न पद बहालीपछि अधिकारीहरुलाई निर्देशन दिएका थिए।
नेपाल विद्युत प्राधिकरणका कार्यकारी निर्देशकले लोडशेडिङको समय घटाउन प्रयास भइरहेको बताए।
तिहार सकिएसँगै दैनिक हुने लोडशेडिङको समायावधि पनि विस्तारै बढ्दै जाने गरेको छ।
विकराल
अघिल्लो वर्ष शुरुमा भूकम्प र त्यसपछि नाकाबन्दीका कारण लोडशेडिङको समस्या विकराल बनेको थियो।
गत वर्ष यसै महिनातिर तत्कालीन प्रधानमन्त्री केपी शर्मा ओलीले एक वर्षभित्र लोडशेडिङको अन्त्य हुने बताएका थिए।
उनले दिएको समयावधि लगभग पूरा हुनलाग्दा सरकार भने अझै पनि पोहोर भएको १२ घन्टा कम लोडशेडिङ कसरी गराउने भन्ने प्रयासमै छ।
यो वर्षको लोडशेडिङ अवस्था कस्तो होला?
विद्युत प्राधिकरणका कार्यकारी निर्देशक कुलमान घिसिङ भन्छन्, “लोडशेडिङ्ग भनेको आयातमा अलिकति गडबड हुन थाल्यो अथवा हाम्रो उत्पादनमा अलिकति गडबड हुन थाल्यो भने त्यहीं हिसाबले थपघट हुन्छ, नभए हाम्रो योजनाअनुसार गत वर्षको भन्दा बढ्दैन।”
यस वर्ष हिउँद याम लोडशेडिङ सात घण्टामा सीमित गर्न प्रधानमन्त्री प्रचण्डले निर्देशन दिएका थिए।
नेपालमा १३ सय मेगावाट विद्युतको अभाव रहेपनि नेपालको विद्युत उत्पादन क्षमता करिब ७ सय मेगावाटमात्रै छ।
अपेक्षा
अघिल्लो वर्ष ढल्केवर-मुजफ्फरपुर द्वीदेशीय प्रसारणलाइनबाट नेपालमा ८० मेगावाट विद्युत आयात भएको थियो।
जसबाट थप १ सय ८० मेगावाट यो हिउँदमा थपिए सरकारको योजना अनुसार लोडशेडिङ सात घण्टामा रहने अपेक्षा गरिएको प्राधिकरणले जनाएको छ।
कार्यकारी निर्देशक घिसिङले थपे, “डिसेम्बर अन्तिम सम्ममा सकाउने लक्ष्य दिइएको छ। त्यतिबेलासम्म सकिएन भने १०/१५ दिन तलमाथि होला। तर त्यो सब स्टेशन एकदमै द्रुत गतिमा बढेको छ। त्यो भयो भने थप २५० मेगावाट आयात गर्ने अवस्थामा पुग्छौँ।”
४५६ मेगावाट क्षमताको माथिल्लो तामाकोशी अबको दुई वर्षभित्र बनिसके त्यसले लोडशेडिङमा व्यापक कमी ल्याउने अपेक्षा गरिएको छ।
त्यसबाहेक चमेलियालगायत निजी क्षेत्रबाट पनि केही आयोजनाहरु आएपछि नेपालीहरुले हिउँदमा चर्को लोडशेडिङ खेप्ने अवस्था नरहने सरकारको अपेक्षा छ।
तर अघिल्लो वर्षको भूकम्पका कारण निर्माण अवधि थप लम्बिएका जलविद्युत आयोजनाहरु बनाउने काम सोचेजति द्रुत गतिमा अघि बढ्न नसकिरहेको सरकारी अधिकारीहरु नै स्वीकार्छन्।
जसका कारण एकाध वर्षमै लोडशेडिङ्ग अन्त्य गर्ने प्रतिबद्धता अझै पनि पूरा हुने ठोस आधार देखिँदैन।
BBC
