कार्तिक १३, २०७३- भारतीय राष्ट्रपति प्रणव मुखर्जीको तीन दिने नेपाल भ्रमणको तालिमका परराष्ट्र मन्त्रालयले शनिबार सार्वजनिक गरेको छ ।
परराष्ट्रले विज्ञप्तीमार्फत् भारतीय राष्ट्रपतिको स्वागतदेखि उनको दैनिक कार्यक्रमबारेमा जानकारी गराएको हो । नेपालको राष्ट्रपति विद्यादेवी भण्डारीले भारतका राष्ट्रपति प्रणव मुखर्जीलाई स्वागत गर्ने भएकी छन् ।

नेपालकी राष्ट्रपति भण्डारीले कात्तिक १७ गते त्रिभुवन विमानस्थलमा भारतीय प्रधानमन्त्री मुखर्जीको स्वागत गर्ने कार्यक्रम तय भएको परराष्ट्र मन्त्रालयले शनिबार विज्ञप्ति जारी गर्दै जानकारी गराएको हो । उनी १८ वर्षपछि नेपाल टेक्ने भारतीय राष्ट्रपति हुनेछन् । सन् १९९८ मा भारतका तत्कालीन राष्ट्रपति केआर नारायण नेपाल भ्रमणमा आएका थिए ।

भारतीय राष्ट्रपतिलाई स्वागत गरेपछि राष्ट्रपति भवन शितल निवासमा नेपालका राष्ट्रपति भण्डारीसँग भेटवार्ता गर्ने छिन् । त्यसपछि शीतल निवासमै भारतीय राष्ट्रपतिको सम्मान स्वरूप दिवा भोजको आयोजना गरिने छ । त्यसपछि उपराष्ट्रपति नन्दकिशोर पुन र प्रधानमन्त्री पुष्पकमल दाहालले पनि भारतीय राष्ट्रपति मुखर्जीसँग छुट्टा छुट्टै भेट्ने कार्यक्रम छ । कात्तिक १७ गते बेलुकी प्रधानमन्त्री दाहालले भारतीय राष्ट्रपति मुखर्जी र उनको टोलीलाई भोजको आयोजना गर्नेछन् । त्यसपछि नेपालका लागि भारतीय राजदूत रणजित रायले आयोजना गरेको भोजमा भारतीय राष्ट्रपति मुखर्जी सहभागि हुने कार्यक्रम छ ।

दोस्रो दिन कात्तिक १८ बिहान मुखर्जी पशुपतिनाथ मन्दिर जाने कार्यक्रम छ । त्यहाँ उनले पूजा गर्नेछन् । त्यसपछि उनले काठमाडौं विश्वविद्यालयले दिन लागेको मानार्थ विद्यावारिधिमा भाग लिनेछन् । मुखर्जीले सोही दिन नीति अनुसन्धान प्रतिष्ठान र भारत फाउन्डेसनले आयोजना गर्ने सेमिनारमा भाषण गर्ने कार्यक्रम छ । मुखर्जीलाई विभिन्न दलका नेताहरूले पनि भेट्ने कार्यक्रम छ ।
यस्तै, कात्तिक १९ मा बिहान मुखर्जी जनकपुर प्रस्थान गर्नेछन् । जानकारी मन्दिरमा पूजा गरेपछि मुखर्जीको सम्मानमा आयोजना गरिने कार्यक्रममा सहभागी हुनेछन् । त्यसपछि उनी पोखरातर्फ लाग्नेछन् । भारतीय राष्ट्रपति मुखर्जी पोखराबाट काठमाडौं फर्केपछि १९ गते बेलुकी भारत फर्कने कार्यक्रम छ ।