कात्तिक १० गते । नापी कार्यालय हेटौंडामा आगलागी हुँदा ३६ जना घाइते भएका छन् । हेटौँडा उपमहानगरपलिका—५ कान्तिराजपथस्थित कार्यालयमा बुधबार दिउँसो आगलागीबाट लाखौं रुपियाँ बराबरको सरकारी तथा निजी सम्पत्तिमा क्षति पुगेको हो ।
आगलागी भएपछि भागदौड र धुवाँका कारण कार्यालयका कर्मचारी र सेवाग्राही गरी ३६ जना घाइते भएका हुन् । नापी कार्यालय रहेको भाडाको भवनको भुईंतल्लाको होटलबाट आगलागी सुरु भएको थियो ।
जिल्ला प्रहरी कार्यालय मकवानपुरका प्रहरी नायब उपरीक्षक बामदेव गौतमका अनुसार घाइते १७ को अर्थोपेडिक अस्पतालमा, ६ जनाको हेटौंडा अस्पतालमा र १२ जनाको चुरेहिल हस्पिटलमा उपचार भैरहेको छ ।
एकजना धुँवाले निस्सासिएर गम्भीर भएकाले थप उपचारका लागि भरतपुर पठाइएको छ । उपचारमा संलग्न चिकित्सककाअनुसार सबै घाइते खतरामुक्त रहेका छन् । भागदौडका क्रममा घाइते भएकाहरुको हात, खुट्टा र कम्मर भाच्चिएको तथा मर्किएको पाइएको छ ।
आगोमा पर्ने भएपछि भागदौड र भवनको माथिल्लोतलाबाट हाम्फालेका कारण धेरै घाइते भएको प्रहरी नायब उपरीक्षक गौतमले जानकारी दिनुभयो । नेपाल प्रहरी, सशस्त्र, नेपाली सेना, दमकल र स्थानीयको करिब एकघण्टाको प्रयासपछि आगो नियन्त्रणमा आएको थियो ।
आगलागीका कारण चारवटा मोटरसाइकल जलेर नष्ट भएको छ । साथै कार्यालयका भौतिक सामग्रीसहित कागजात जलेर क्षति पुगेको छ ।
यसैगरी कार्यालय भवनमा रहेको हार्डवेयर पसलका सामग्रीहरुसमेत आगलागीबाट जलेका छन् ।
कार्यालय परिसरमा रहेको तीनवटा होटल मध्ये कुन होटलबाट आगलागी सुरु भएको र ग्यास लिक भएर आगलागी भएको बताइए पनि एकिन नभईसकेको अनुसन्धान भईरहेको प्रहरी नायब उपरीक्षक गौतमले बताउनुभयो दिनुभयो । हेटौँडा–२ मा सरकारी कार्यालयहरु रहेको क्षेत्रमा मालपोत कार्यालयको आफ्नै भवन निर्माण भएपनि वर्षौदेखि भाडामा बस्दै आएको छ ।

gorkhapatraonline