राजेश बर्मा
तस्बिरः माधव तिम्लिसिना
काठमाडौँः सरकारले उपत्यकाको प्रख्यात ब्राण्डेड मिठाई भण्डार अनमोल स्वीट्समा शिलबन्दी गरेको छ । विभागको संयुक्त अनुगमन टोलीले नक्सालको भाटभटेनीस्थित अनमोल स्वीट्स भण्डारमा मिठाइको उत्पादन र बिक्री वितरणमा रोक लगाएको हो ।
विभागका सह–प्रवक्ता मदन चापागाईका अनुसार अनुगमनको क्रममा उक्त भण्डारमा तयारी अवस्थामा सजाएर राखिएका विभिन्न प्रकारका मिठाइमा भुसुना, झिंगा र साङ्ला हिडिरहेको फेला परेको आधारमा उक्त भण्डारमा शिलबन्दी गरिएको हो । चापागाईले भने, ‘ बिक्रीको लागि तयारी अवस्थामा राखिएको पानीपुरी र पानीपुरी राखिएको वरिपरी पनि भुसुना र साङ्लै साङ्ला यत्रतत्र डुलिरहेको भेटिएको छ ।’
त्यस्तै भान्छा कोठा निक्कै दुर्गन्धित अवस्थामा भेटिनुका साथै भान्छा कोठामा फोहोर कपडा र फोहोर पानी बगिरहेको अनुगमनको क्रममा फेला परेको विभागले जनाएको छ । ‘तयारी मिठाई, मिठाइको कच्चा पदार्थ र तयारी पानीपुरीमा भुसुना, झिंगा र साङ्ला भेटिएकाले अनिश्चितकालका लागि उत्पादन तथा बिक्री वितरणमा रोक लगाएका छौं’, सह प्रवक्ता चापागाईले भने ।
अनुगमनमा सहभागी भएका उपभोक्तावादी माधव तिम्लिसिनाका अनुसार मिठाई तयार गर्न आवश्यक पर्ने कच्चा पदार्थसमेत गुणस्तरहिन र म्याद नाघेको अवस्थामा भेटिएको थियो । यसैगरी उक्त भण्डारबाट अनुगमन टोलीले गुणस्तरहिन र अखाद्य भन्दै दुई किलो दूध, १४ किलो रसवरी, १४ किलो लालमोहन र एक किलो पानी पुरी बरामद गरी नष्ट गरेको छ । विभागले चार वर्षअघि पनि मानव स्वास्थ्यलाई हानि गर्ने गरी मिठाई उत्पादन गरेको अभियोगमा उक्त भण्डारमा शिलबन्दी गरेको थियो ।
तिहार नजिकिदैं गर्दा विभाग, जिल्ला प्रशासन कार्यालय, आपूर्ति तथा उपभोक्ता हित संरक्षण विभाग, उपभोक्तावादीसहितको संयुक्त अनुगमन टोलीले मिठाई उत्पादन गर्ने उपत्यकाको ठूला भण्डारगृहमा अनुगमन गर्न सुरु गरेको छ । तिहारमा सबैभन्दा बढी मिठाईको कारोबार हुने भएकाले व्यवसायीले गुणस्तरहिन मिठाई उत्पादन गरी बिक्रि गर्न सक्ने आशंकामा सरकारले अनुगमनलाई तिव्र बनाएको हो ।
यसअघि संयुक्त अनुगमन टोलीले मिठाई उत्पादन गर्ने बाग्मती स्वीट्स, आँगन ब्राण्डको पशुपति फुड्स, राम भण्डार, सजनगोठलगायतका स्थानमा पनि अनुगमन गरेको थियो । ति स्थानमा पनि गुणस्तरहिन मिठाई फेला पारेको थियो ।
annapurnapost