विवाद बढेपछि गृहमन्त्री नभेटिकनै एसपीहरु काममा फर्किए
केपी ढुंगाना, काठमाडौं
कार्तिक ३, २०७३- गृहमन्त्री विमलेन्द्र निधिको निर्देशनमा प्रहरी प्रधान कार्यालयले काठमाडौं झिकाएका पर्साका एसपी राजुबाबु श्रेष्ठ र सिरहाका एसपी श्याम ज्ञवालीलाई फिर्ता पठाएको छ ।
गृहमन्त्री निधिले अपहरण र हुन्डीमा जोडिएकालाई कारबाही प्रक्रिया अगाडि नबढाउन दिएको निर्देशन अटेर गरेको भन्दै निमित्त प्रहरी प्रमुख विज्ञानराज शर्मा मार्फत एसपीद्वयलाई काठमाडौं झिकाए पनि विवाद बढेका कारण गृहमन्त्रीले भेट्दै नभेटी पूर्ववत कार्यक्षेत्रमै प्रमुखको रुपमा पठाएको हाे ।
मन्त्री निधिले भेट्न बोलाएको भन्दै शर्माले मंगलबार दुवै एसपीलाई लिएर गृह मन्त्रालय पुगेका थिए तर भेट हुन भने सकेको थिएन । डेढ घण्टा कुर्दासमेत मन्त्री निधि नआएपछि उनीहरूले गृहसचिव लोकदर्शन रेग्मीलाई भेटेका थिए । शर्मा र दुवै एसपीसँग रेग्मीले करिब एक घण्टा कुराकानी क्रममा पेसीमा झिकाउनुको कारणमा प्रवेशै नगरी जिल्लाको शान्ति सुरक्षाबारे छलफल गरेका थिए ।
नेपाल प्रहरीका प्रवक्त डिआईजी हेमन्त मल्लले पनि दुवै एसपीलाई जिल्लाको शान्ति सुरक्षाको स्थिति बुझ्न मात्रै केन्द्रमा बोलाइएको बताए । ‘जिल्लाको शान्ति सुरक्षाको वस्तु अवस्था बुझ्नो निम्ति बोलाएका थियौं बुझ्ने काम सकिएकाले दुवैलाई सम्बन्धित जिल्लाका काम गर्न पठाइसकेको छौं,’ उनले भने ।
मंगलबार भेट्न नसकेको गृहमन्त्रीले बुधाबार भेट्ने बताएपनि उनीहरुसँग भेटघाट नै नगरी पुन: फिर्ता पठाइएको हो ।
सिरहामा माओवादी केन्द्रका नेता तथा पूर्वशान्तिमन्त्री विश्वनाथप्रसाद साहसहित १० जना माओवादी नेतामाथि सरकारी कर्मचारीको अपहरण गरी जबर्जस्ती कागज गराएको जाहेरी दर्ता छ ।
जाहेरी दर्ता रहे पनि माओवादी केन्द्रका नेता पक्राउ परेका छैनन् । पर्सामा हुन्डी कारोबारीको अभियोग अनुसन्धानमा व्यापारी सन्तोष जैनको परिवार नै प्रहरी हिरासतमा छ ।
स्रोतका अनुसार अपहरणको आरोप लागेका माओवादी केन्द्रका नेताविरुद्ध सिरहामा जारी अनुसन्धान र हुन्डीको कारोबारमा पर्सा प्रहरीले पक्राउ गरेका नेपाली कांग्रेस निकट व्यापारीमाथि कारबाही रोक्न दुवै एसपीमाथि दबाब बढेको थियो । उनीहरूले जाहेरी दर्ता भइसकेको विषय भन्दै अनुसन्धान रोक्न मानेका थिएनन् ।
दुवै एसपीले अस्वीकार गरेपछि गृहमन्त्री निधिले नै चासो राखेका थिए । स्रोतका अनुसार प्रहरी महनिरीक्षक उपेन्द्रकान्त अर्याल हुँदा नै दुवै एसपीलाई काठमाडौं बोलाएर प्रस्टीकरण लिने प्रयास भएको थियो । अर्यालले उनको निर्देशन अटेर गरेका थिए । उनी प्रहरी प्रमुखको सम्मेलनमा भाग लिन शुक्रबार अमेरिका गएपछि निमित्त प्रहरी प्रमुख शर्मामार्फत दुवै एसपीलाई काठमाडौं झिकाइएको हो ।
ekantipur