उमाकान्त पाण्डे/उज्यालो

दुबई, कात्तिक ३ – १५ दिनभित्र सर्वोच्च अदालतमा उपस्थित हुन म्याद पाएका अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्की दुबईमा देखिनुभएको छ ।

उहाँ दुबईको शेख जायद रोडस्थित दुसितथानी होटलमा एक हप्तादेखि बसिरहेको त्यहाँ कार्यरत नेपालीले बताएका छन् । उनीहरुका अनुसार कार्कीले हाफपाइन्ट लगाएर दुबई मल घुम्नुभएको थियो ।स्रोतका अनुसार कार्की बस्दै आएको होटलमा नेपाली दूतावास आबुधाबीले प्रयोग गर्दै आएको गाडी पनि पार्किङ गरिएको थियो । तर त्यो गाडीमा दूतावासबाट को पुगेको थियो भन्ने खुलेको छैन । कार्कीको व्यक्तिगत भ्रमण भएकाले वास्ता नगरेको दूतावासले जनाएको छ ।

गएको असोज ३ देखि २१ गतेसम्म भ्रष्टाचार निवारणसँग सम्बन्धित निकायको बैठकमा भाग लिन भन्दै क्यानडा जानुभएका कार्कीले अहिले पनि क्यानडामै रहेको भन्दै पटक पटक गरेर कात्तिक १० गतेसम्म बिदा मागेको र राष्ट्रपति कार्यालयले उहाँको बिदा स्वीकृत समेत गरिसकेको छ ।

तर बिदा लिएर क्यानडामा भएका व्यक्ति स्वयमले कसरी आयोगको लेटरप्याडमा बिदा फारम भरे भन्ने खुलेको छैन । क्यानडामै रहेको भन्दै आफ्नो बिदा लम्ब्याएपनि अख्तियार प्रमुख कार्की एक हप्तादेखि दुबईमा हुनुहुन्छ ।

ujyaaloonline